Kawani sa Daneco giluthang, angol

TAGUM CITY - Samdan sa walang abaga ang lineman sa Davao del Norte Electric Cooperative (Daneco) human gipusil sa gikaintapang sakop sa Riding in Tandem Killers (RTK) alas 7: 10 kagahapon sa buntag.

Ang pagpamusil nahitabo atbang sa Pilot Elementary School, Mabini Street, Barangay South ning siyudad.

Biktima giila nga si Epher Jumaran, 28, minyo, molupyo sa Purok 2, Block 2, Lot 10, Cristo Rey, Barangay West, Tagum City.

Sa imbestigasyon ni SPO1 Nathaniel Apolonio sa Tagum City Police Station (TCPS), nasayran nga si Jumaran nagmaneho sa Isuzu Crosswind, kolor silver ug dunay plaka numero LGS-563, uban ang amo nga si Engineer Dicky Ongking ug anak nga 10 anyos nga lalaki nga ihatud unta sa nahisgutang tulunghaan.

Dihang mihunong ang sakyanan ni Ongking, duha ka mga suspetsado nga nagsul-ob og jacket nga pula ug itom ug sakay og motorsiklong Suzuki Raider junior nga kolor pula kalit lang mihunong sa walang bahin ug mamusil sa makatulo ka higayon tumong kang Jumaran.

Human sa pagpamusil, mga suspetsado daling misibat palayo sa maong dapit samtang mga nagpakabanang lungsuranon dali usab nagdala sa biktima ngadto sa Medical Mission Hospital.

Sumala ni Police Senior Inpector Gerardo Locaylocay, chief investigator sa TCPS nga padayon pa nilang gisusi unsay motibo sa pagpamusil.

Nasayran nga si Jumaran usa ka regular nga empleyado sa Daneco isip lineman ug usa pa lang ka bulan nga nahimong drayber ni Ongking dihang si Ongking mikalas sa DANECO ilawom sa Cooperatve Development Authority (CDA) human nga gitudlong OIC General Manager ni NEA Administrator Editha Bueno.

Dugang nasayran, gikan kang Locaylocay nga gihikling nila ang posibilidad nga tuyo sa mga suspetsado mao si Ongking sanglit mao usab kini ang pagtuo sa asawa ni Ongking.

"Tuyo gyud sa killer ang drayber kay mao gyud ni ang gipunting ug sa sobrang dali-dali seguro wala na kini maseguro kung napatay na ang ilang tuyo tungod usab sa daghang tawo niadtong higayona."

Dugang pa ni Locaylocay nga paspas kaayong nakasibat ang mga suspetsado.

Hinuon, dugang pagsusi pa ang himuon sa TCPS aron mahibaw-an ang tinuod nga motibo sa maong pagpamusil. (Teddy Cabana)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph