Dear Noy kulas,
Ako si Miss Confused, adunay mga anak. Naglibog ko sa real score namo sa amahan sa akong mga anak.
Nagtungha ang akong live-in sa high school aron maka-graduate. Duna siyay ka textmate nga akong nasakpan. Ako siyang giaway apan iya ming gibiyaan sa mga bata. Akong giteksan ang babaye ug gipangutana kon uyab ba sila. Niangkon ang babaye. Wa ko pasagdahi sa pamilya sa akong kapuyo.
Magkita mi panagsa. Nilabay ang pipila ka mga buwan, nadawat nakog gamay ang hitabo.
Dunay mga higayon nga nanglaag mi ug nagdug na mi og balik bisan wa pa mi mag-ipon.
Ako siyang gipangutana kon nganong nagluib siya nako. Naglibog sab kuno siya kon nganong iya tong nabuhat. Gusto niya pasagdahan nako siya kay total way nahitabo kanila.
Akong gisuwayan nga magtagad mi bisan ako gisakitan. Naglagot, stressed ug maglisod ko og move on. Pinangga hinuon kaayo mi sa iyang pamilya. Wa ko nila pasagdi. Ang ako lang anugnan kay akong gisugal ang tanan kong maayong kaugmaon. Apan wa ko mangandoy nga mabungkag ang among pagpuyo.
Please tambagi ko kon unsa ang akong buhaton. Gagmay pa ra ba ang among mga anak.
MISS CONFUSED
Miss Confused,
Ang bottom line ani mao nga wa siya makontento sa usa lang ka babaye sa iyang kinabuhi. Daghan ang mga lalaki nga maglisod nga mag-one-woman-man. Mangita og laing karingking. Mao na nga di ka na angay nga maglibog kon nganong kini iyang gibuhat.
Duha ang imong mahimo niini, biyaan ang imong kapuyo o magpabilin ka for the sake sa mga bata. Sa imong kahimtang karon, wa kay laing choice nga akong nakita, magpabilin ka uban kaniya samtang di mo pa makaya nga mobarog nga kinaugalingon. Niangkon ka nga lisod ang imong kahimtang, busa ang iyang pamilya ang nagsuporta karon kanimo ug sa inyong mga anak. Tungod ug alang sa mga bata, magpabilin ka uban kaniya. Anyway, ang consolation nimo karon mao nga di mo kasado. Di lisod ang paggawas sa relasyon kon moabot na ang higayon nga makabarog ka na.
Kay pinangga ka sa iyang pamilya, pangayog suporta nila pinaagi sa pagtabang sa pag-atiman sa mga bata samtang ikaw mangitag kapanginabuhian, kana kon ikaw makahimo, aron di ka na entirely magsalig kanila. Kay sa kahimtang karon, ang tanang sources nagagikan kanila nga maghimo kanimong ulipon sa iyang pamilya. Mopasamot kini sa imong kasuko ug kaguol kay magtan-aw ka sa imong kaugalingon nga helpless.
Di kini makatabang kanimo mentally. Lahi kon naa kay kaugalingon nimong income.
Kini ang labing maayo mong alternatibo sa pagkakaron. Use your head, not your heart, for the sake sa mga bata.
NOY KULAS
(Alang sa imong problema, e-mail sa kulassuper@sunstar.com.ph ug rojval69@yahoo.com)