MILUSAD og bag-ong programa si Presidenti Benigno “Noynoy” Aquino III alang sa pagkasikop sa mga high profile fugitives sa nasod kinsa hangtod karong mga higayona ang pabilin gihapong gawasnon. Kini susama sab sa sikat nga TV gameshow nga “Who Wants to be a Millionaire?” kay dili tiaw ang reward money nga ilang gipatong sa ulo ning maong mga gipangita sa balaud.
Nag-una sa listahan mao si Jovito Palparan alyas “The Butcher” nga P2 milyunes ang balor, kinsa gitumbok nga sad-an sa kasong kidnapping sa duha ka mga estudyanteng aktibista nga nangahanaw niadtong tuig 2006 nga sila si Sherlyn Cadapan og Karen Empeno.
Si kanhi Palawan governor Joel Reyes ug iyang igsoon nga si Mario Reyes nga adunay P2 milyunes gihapon nga presyo. Tungod sa kasong pagpatay sa broadcaster ug environmentalist nga si Gerry Ortega.
Laing tag P2 milyunes usab gihapon ang presyo alang nila ni Dinagat Congressman Ruben Ecleo tungod sa kasong Paricide og Delfin Lee sa Globe Asiatique tungod sa kasong syndicated estaffa.
Unya mokabat usab sa P5.6 milyunes ang gipatong sa ulo nila ni Kumander Benito Tiamzon ug Jorge Madlos tungod sa nagpatong-patong na nga mga krimen nga ilang nabuhat sa ngalan sa kaugmaran sa Communist Party of the Philippines – New People’s Army.
Aron mabutang pa gyud sa seguro, si Interior Secretary Jesse Robredo ang mi-umol og Inter-agency Task Force nga gilangkuban sa National Bureau of Investigation ug Philippine National Police arun tinud-on na gyud nga mopahigayon sa manhunt operations batok sa maong mga personalidad nga malapason sa balaod.
Samtang dalaygon ang bisan unsang matang sa pagpaningkamot apan dili gyud kalikayan ang pagtumaw sa pagduda sa publiko sa dagan ning maong mga kaso.
Kay nganong gikinahanglan pa man ang pagwara-wara sa minilyon nga kuwarta isip ganti kon tinud-anay pang competent ug dili mga tapulan ug bulok kining atong mga nagdumala sa kasamtangang mga law enforcement agencies?
Adunay gahum, salapi, pundok ug koneksyon ang maong mga high profile fugitives maong dangog kaayong dakpon. Apan og tinud-anay nga molihok ang makinarya sa gobyerno batok kanila, seguradong mahi-apsan ra gihapon sila sa kamot sa balaud.
Sa katapusan, ang reward money dili lamang simbolo sa pagka-inutil sa mga tigpatuman sa balaud. Kini tilimad-un usab sa pagkawala’y pagsalig sa publiko sa hingtungdang mga ahensiya sa gobyerno mao nga dili morisgo sa pagsulti ug wala’y pakati nga ganti.