Sugilanon: Ang makililimos

ERLANDO LIGAN MAJAN

Barangay Hipodromo, Cebu City

MAKILILIMOS si Entoy. Pungkol ang wala niyang kamot. Apan ang tuo niyang kamot nga maoy tigdawat sa mga limos sa katawhan mao ang moantog sa mga sensilyo sa sementadong aseras. Hantakero siya. Sa hari o sa patay? O, mopusta ka? Mopatad ka na?

Alegre si Entoy sa hantakan. Di siya kawad-an og sapi ilabi na nga senyor sitisen sab siya sa dakbayan sa Sugbo. Magdawatan sab siyag usa ka libo ka pesos matag buwan sa lokal nga kagamhanan sa dakbayan sa Sugbo. Senyor sitisen na ug ‘person with disability’ pa gyud siya. Bisan asa, maskin hain, magdawatan siya sa usa lamang ka benepisyo. Suwerte siya, matod pa sa ilang barangay kapitan nga nailhan nga si Panday nga usa usab ka magsisibya sa radyo DYFR. Pungkol na, senyor sitisen pa, ug maayong mobangkag kaon kon makagurdog daghang sapi sa hantakan!

“Matay da, lupig ko nimo, Entoy,” matod pa ni Panday. “Kon modaog ka sa hantak, maglangoy-langoy kami sa mahalong mga ilimnon ug may kinilo pang litson!”

Molapad ang atay ni Entoy sa dakong pagdayeg. Siya ray makililimos nga dili magutman ug makapakaon pag mga tawo kon suwertehon sa hantakan.

Wala siyay kagul-an nga masero sa hantakan kay may puhunan siya kanunay gikan sa iyang pagpakilimos. Problema na sa mga tawo sa Social Welfare Department sa pagsikop kaniya. Kadaghan sa mga makililimos sa dakbayan ug dili kini maato sa pag-atiman.

Bahin sa hantakan, walay pulis nga modakop kanila. May ‘datong’ ang kapulisan.

Mao nga hantak, ma-wala o ma-tuo man. Banat ti! Tira ti!

Apan wala damha ni Entoy dihang nakagurdo siyag dako sa hantakan, linibo ang sapi nga iyang daog, kalit lang nga may nagtaptap sa ilang mga nawong. Gihold-ap siya. Gitulis siya. Milugnot siya, apan giilog ang iyang bag nga puno sa salapi, ug giluthang siya. Nahagba siya sa yuta nga nagkadugo. (KATAPUSAN)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph