USA ka traysikad drayber ang namatay human gipusil sa usa ka grupo sa mga batan-on alas 3:30 sa kadlawon kagahapon didto sa korner Matina Gravahan, MacArthur Highway, Barangay Matina Crossing, siyudad sa Davao.
Naila ang biktima nga si Kenneth Burlaza Cabalo, alyas Bombo, 18, nagpuyo sa Sto. Tomas, Tugbok District, ning dakbayan.
Alas 11 sa buntag kagahapon nasikop usab ang gitudlong suspek sa pagpamusil nga si Aljon Paraiso Gayro, hamtong ang pangedaron, pinaagi sa gihimong follow-up operations sa Talomo Police Station.
Nasayran nga ang biktima, kauban ang higala niini nga si Melvin Casing Tejada, naghulat og jeep sa lugar nga nahitaboan sa krimen.
Kalit nga miabot ang grupo sa mga batan-on nga gibana-banaang mga napulo kabuok ug miduol ngadto sa biktima.
Kalit nga gipusil sa suspek ang biktima gamit ang sumpak tumong sa walang dalunggan hinungdan sa iyang kamatayon.
Daling nanagan ang mga batan-on paingon sa interyor nga bahin sa Matina Gravahan.
Sa gihimong follow-up operation sa kapulisan, nadakpan si Gayro subay sa pahayag sa usa ka witness.
Narekober usab sa kapulisan ang sumpak nga gigamit sa suspek.