MAGUINDANAO Province -- Gihangyo karon sa chairperson sa grupong Justice Now ang suporta sa media sa padayong pagtuki sa isyu sa Maguindanao massacre.
Kini ang apela ni Emily Lopez, kabanay sab sa usa sa 58 nga mga biktima sa mangilngig nga krimen sa Sitio Masalay, Barangay Salman, Ampatuan, Maguindanao niadtong Nobyembre 23, 2009.
Matud ni Lopez nga bisan miagi na ang pipila ka tuig sukad nahitabo ang krimen, wala pa gihapon sila mawad-an og paglaum hinungdan nga mihangyo sa mga sakop sa Media nga dili mobuhi sa pagtuki sa isyu aron maangkon ang hustisya.
Miduso sab og letter of appeal ang pamilya sa mga biktima sa Maguindanao massacre sa Supreme Court alang sa pagpadangat sa ilang mga gustong mahitabo.
Ang maong letter of appeal gilangkuban sa hangyong speedy trial, speedy resolution sa mga gi-file nga mga motion sa Supreme Court ug Court of Appeals ug pagtakda og guidelines sa SC aron basehan sa pagdesisyon sa mga mosyon.
Karong Nobyembre 23 subling magtapok ang mga pamilya sa mangilngig nga krimen sa massacre site uban ang mga sakop sa Media ug Maguindanao Governor Esmael "Toto" Mangudadatu aron mohalad og bulak, mosindi og kandila apil na ang Santos nga Misa alang sa mga biktima sa masaker.
Apan posible sab kining dili mahinayon gumikan sa init nga sitwasyon sa seguridad sa Maguindanao sa paglutos sa militar sa mga miyembro sa Bangsamoro Islamic Liberation Front. (Edgardo Fuerzas)