NAPALGAN na kagahapon sa buntag ang patayng lawas ni Interior and Local Government Secretary Jesse Robredo sa gibana-bana nga 180 ka tiil nga gilawmon sa dagat ug mga 800 metros ang distansya gikan sa baybayon sa Masbate City.
Alas 8:15 kagahapon sa bontag sa dihang kini gikonpirmar ni Transportation Secretary Mar Roxas. Alas 7:25 kagahapon sa buntag sa dihang ang mga technical diver nakasigpat sa lawas sa Piper Seneca nga eroplano nga maoy gisakyan ni Robredo gikan sa Mactan Airport niadtong Sabado sa hapon.
Matud ni Roxas nga duol sa nahagsa nga eroplano, nasigpatan sa divers ang tulo ka mga patayng lawas nga nag-apil sa kang Robredo, ang sa piloto nga si Capt. Jessup Bahinting ug sa Nepalese nga si Kshitiz Chand.
Sa habig nila ni Robredo ug Bahinting, daghan ang nasubo gumikan kay silang duha nakahimo ug mga maayong binuhatan sa dihang buhi pa. Sa habig sa Nepalese nga si Chand, subo gihapon apan gamay ra ta ug maistorya niya gumikan kay wala kaayo ta masuhito sa iyang pagkatawo.
Si Robredo nagbilin og maayong legasiya isip maayo nga opisyal sa gobyerno ug maayong haligi sa iyang pamilya. Lisod siyang hikalimtan sa iyang mga paisano sa Naga City, sa Camarines Sur. Siya nahimong Mayor sa mao nga siyudad sukad niadtong tuig 1988 - 1998 ug nausban niadtong tuig 2001 – 2010.
Sa pagpamatuod sa iyang maayong panerbesyo sa gobyerno, siya nakadawat ug labing menus 14 ka mga presitihiyusong pasidungog nga naglangkob sa 2000 Ramon Magsaysay Award for Government Service.
Isip amahan, bisan sa kahagip-ot sa iyang panahon gumikan sa serbesyo sa gobyerno, apan siya naninguha nga mapanday ug tarong ang iyang pamilya. Iyang gipakita ang gugma sa amahan sa dihang naninguha siya sa pagtambong unta sa awarding sa swimming competition sa Naga City alang sa iyang kamanghorang anak nga si Lillian Therese.
Haum ug tukma nga siya gitudlo ni PNoy nga mangulo sa DILG sukad niadtong Hulyo 2010.
Subo lang nga palandungon nga wala pa diay gikonpirmar sa Commission on Appointments (CA) ang gikuptang posisyon ni Robredo. Susama sa nahitabo ni Dolphy nga diha na nagkarag-karag ang gobyerno nga ihatag kaniya ang National Artist Award human sa iyang kamatayon.
Samtang si Capt. Bahinting nga us aka piloto ug tag-ia ug eroplano ang nahimong istrumento sa pagkuha ug vials sa anti-venom sa probinsya sa Camiguin nga gitambal kang Ronaldo Aventurado kinsa napaakan ug cobra sa Cebu Zoo niadtong Daghan ang mihulagway kaniya nga relihiyuso, buotan ug matinabangon kaayo labi na kon gikinahanglan nga gamiton ang iyang mga gagmayng eroplano. Gani si Aventurado mihulagway kang bahinting nga us aka anghel ug sangko sa langit ang iyang pasalamat niini.