PATAY ang collector human gitabangan og luba niadtong Miyerkules mga alas 11 sa buntag sa dalan Tuburan ning siyudad sa Cagayan de Oro.

Dead on the spot ang biktima nga giilang si Emmanuel G. Catimpuyan, 40, minyo, taga Buenavida, Lumbia ning siyudad nagnegosyo og lending ug maoy mangolekta sa iyang mga kostumer.

Sa pakighinabi sa Sun.Star SuperBalita ngadto kang Senior Police Officer 4 Edilberto Carillo kinsa chief investigator sa Police Station 8 (PS8) sa Lumbia, gisaysay niini nga gikan ang biktima sa Tuburan nga bahin ug nangolekta.

Pauli na siya niadtong tungora dihang kalit lang giatangan sa upat ka mga suspetsado, unang gisita ug dayon luba makaupat ka higayon hinungdan nakaangkon og samad sa likod ug tulo sa dughan niini.

Nawala ang koleksyon ni Catimpuyan sa pag-imbestigar sa kapolisan. Adunay nakakita sa insidente ug nitudlo sa mga suspek hinungdan nga ang mga opisyales sa barangay Pigsag-an ug Tuburan nihimo og operasyon pagpangita sa mga suspek.

Sa managlahing oras nasikop sila si Alex Balicuatro ug isguon niining si Renjie, Frances Magsalo, ug Ryan Granada.

Pulos nagtingkagol sa prisuhan ang upat ka mga suspek kinsa pulos mihimakak sa krimen.

"Dili man kami ang nagpatay kadto man usa namo ka kauban nga wala nadakpan," butyag sa mga suspek.

Matud ni Carillo nga pagpanulis ang motibo sa krimen labina nahibaw-an nga dako ang makita niini. Kanhi lending collector si Catimpuyan ug pila ka tuig na nga nagsolo ug maoy negosyo niini.

Daghan sa mga kostumer niini nagpuyo sa mga bukirang bahin. Hinuon wala giapil pagdala ang motorsiklo sa biktima ug ang kwarta ra niini ang nawala.

Gikatkadang pasakaan og kasong robbery with homicide ang mga suspetsado.