TUNGOD sa sapatos nga gibanos sa pagsul-ob, anak gipusil sa iyang amahan sulod sa ilang balay niadtong Miyerkules sa udto sa Sitio Bawud, Barangay Magdugo, dakbayan sa Toledo.
Apan ang amahan nitataw nga aksidente ang pagkapusil kay nahitabo kini samtang sila naglayog sa iyang anak nga armado nga nanghagis samtang nagluto og manok.
Si Romnick Camancho, 22, ulitawo, way trabaho, sakop sa Alpha Kappa Rho (Akrho) fraternity samdan sa dughan human napusilan sa iyang amahan nga si Narciso Camancho Jr., 47, staffer sa usa ka construction company sa Carmen Copper.
Si SPO4 Gil Lastimosa, desk officer sa Toledo Police nga nahinabi sa Sun.Star Superbalita, nagkanayon nga niadtong Miyerkules sa alas 12:30 sa udto ang amahan ug biktima nagkalalis tungod sa sapatos nga gibanos sa nauwahi.
Giingong wa makauyon ang amahan sa gibuhat sa iyang anak sa pagbanos sa pagsul-ob sa iyang sapatos hinungdan nga nahitabo ang krimen.
Ang biktima gidali sa pagdala sa tambalanan sa dakbayan sa Toledo, apan tungod sa iyang samad sa dughan nga dilikado gibalhin sa Vicente Sotto Memorial Medical Center (VSMMC).
Apan sa pagka-alas 5:10 sa hapon sa samang adlaw, si Narciso nitahan sa kapulisan sa dakbayan sa Toledo human gihatod ni Kapitan Florante Restauro, sa Barangay Media-Onse, nga iyang gidangpan.
Ang armas wa na marekuber sa kapulisan kay gilabay sa amahan una nikaratil sa pagdagan sa kahadlok sa hitabo.
Apan si Narciso, nga nahinabi sa Sun.Star Superbalita nipasabot nga di tinuod nga ang
sapatos maoy rason nganong napusilan niya ang iyang anak kon di ang himungaan sa iyang umagad nga nawala.
Nagkalalis sila sa iyang anak nga biktima niadtong miaging buwan human ang sapatos sa maguwang niyang anak gibanos hinungdan nga iyang gibadlong nga di manghilabot sa di niini butang.
NANGHAGIS
Siya niasoy nga niadtong Miyerkules sa udto, ang iyang umagad nga babaye nangita sa iyang himungaan nga nawala samtang gihikot sa ilang balay.
Iyahang gisultihan ang iyang umagad nga babaye nga adtoon ang iyang payag kay toa ra
didto ang iyang manok, diin didto sab ang biktima niadtong higayuna.
Ang iyang anak iyang gihulagway nga badlungon kay mangawat tungod kay adik.
Niadtong higayuna, ang biktima nag-andam sa kaldero, mantika ug asin aron unta
magluto og sud-an.
Gipangutana kini sa iyang umagad kon unsay sulod sa kaldero, apan kalit nga nasuko ug
nagkalalis ang duha.
Gibunal sa biktima ang kaldero nga didto ang hilaw pa nga manok nga nasuta nga kinawat apan di ang manok nga gipangita sa iyang umagad.
Gipatidpatiran ug gituok sa iyang anak ang iyang umagad hinungdan nga ang ubang mga sakop sa iyang pamilya nangayo og tabang kaniya aron di mahinaykan sa biktima ang iyang umagad.
NASUKO
Gibadlong gilayon niya ang iyang anak nga di tuk-on ug pabuhian ingon man di na dagmalan ang iyang umagad apan nasuko kini, siya maoy giatubang.
Kalit kining nibunot sa wa matinong armas hinungdan nga iyang gilayog aron unta ilugon
ang armas.
Sa iyang pag-ilog sa armas natumba siya ug napusilan ang iyang anak.
Wa siya masayod ko unsang klase sa armas ang nakaigo sa iyang anak kay gibilin niya sa iyang pagdagan.
Posibling napunitan kini sa mga silingan nga nitapok human sa kaguliyang.
Nagmahay siya nga napusilan niya ang iyang anak, apan wa siyay mahimo kon di sa pag-ilog sa armas kay nakita niini nga delikado nga siyay mapatay.
Kaniadto pa problima na kaayo nila ang ilang anak.
Ang inahan niini gituok na usab ug kanunay manghagis ipangbunal ang ilang mga butang, ingon man mga gamit sa kusina.
Atubangon na lang niya kon pasakaan siya og kaso sa iyang anak sanglit wa siyay mahimo kay nahitabo na ang krimen.
Ilang gipa-blotter ang hulga niini nga kon mabuhi pa siya, dunay mahitabo kanila hinungdan nga kini maoy ilang gikabalak-an karong mga panahuna.
Ang iyang anak luwas na sa makuyaw nga kahimtang hinungdan di siya mokumpiyansa niini tungod kay naburyong na ang utok sa pagsigeg gamit sa drugas.