NILANDING sa Northern Mindanao Medical Center (NMMC) ang usa ka 16 anyos nga dalagita human giingong gipusil sa uyab niini kagahapon mga alas 12:20 sa kadlawon sa Zone 7, Bayabas ning siyudad sa Cagayan de Oro.

Giila ang biktima nga mao si Pinky Romeo, sa susamang dapit ug gitumbok nga suspetsado ang giingong uyab niining giilang si Richard, hingkod ang edad, residente sa Calaanan ning siyudad.

Sa record nga natala sa NMMC nasayran nga anaa sa likod nga bahin sa puloy-anan ni Pinky ang duha ug giingong gusto ni Richard nga ubanon si Pinky apan wala kini mosugot labina kay gabii na niadtong tungora.

Wala kabantay ang biktima nga aduna diay kini dala nga 38 kalibre ug kalit lang nga gipusil ang biktima hinungdan nga nakaangkon og samad sa iyang tangkugo ug likod nga bahin kinsa daling gidala ang biktima sa NMMC.

Dali dayon nga misibat ang suspek. Gisunod sa Police Station 4 (PS4) sa Carmen ang insidente ug padayon pa nga gipangita sa polis ning panahona. (SVB)