DUNAY ordinansa ang Siyudad sa Sugbo nga nagdili sa mga bata nga nagpanuigon og 7-anyos paubos sa pagsakay og motorsiklo.
Nalatid kini sa City Ordinance 2033 nga gipalabang niadto pang 2004.
Bisan pa niini, wa masayod ang publiko nga naa diay kining mao nga ordinansa hangtod nga gipirmahan ni Presidente Benigno Aquino III ang Republic Act 10666 nga susama sa ordinansa sa Siyudad, apan mas dagko og silot.
Ang balaud, usa man ka ordinansa o nasudnong balaud, gipatuman alang sa usa ka katuyoan. Kon kini may labot sa transportasyon, alang kini sa kaluwasan ug kahapsay sa kadalanan.
Apan daghan ang mga balaud sa tranportasyon nga weder-weder ang pagpatuman. Kana lang pagsul-ob og helmet, gimando kini sa nasudnong balaud, apan daghan ang wa motuman niini.
Sagad anha ra sa urban centers makita ang mga motorista nga mag-helmet. Sa medyo suok nga mga dapit, labina niadtong duna nay mga habalhabal nga nag-operate, daghan gihapon ang wa magtuman sa balaud.
Ang tahas sa pagpatuman sa nasudnong balaud gisangon ngadto sa Land Transportation Office (LTO). Apan sa kadaghan sa mga dapit, naglisod ang mao nga departamento.
Seguradong mao usab ni ang mahitabo sa bag-ong balaud nga nagdili sa mga bata sa pag-angkas.
Naa na sa atong kultura ang pagpabaya, bisan kon ang tumong niini mao ang kaluwasan.
Makita mo sa kadalanan ang daghang mga malapason, apan pasagdan lang sa mga awtoridad.
Kanus-a pa kaha mausab ang mentalidad sa katawhan, gikan sa mga opisyal ngadto sa labing ubos nga lungsoranon?
Way balaud nga makadaut, alang kini sa kaayuhan sa tanan busa angay ipatuman.