NABULSA nang daan sa 9-time champion University of the Visayas (UV) Green Lancers ang no.1 nga puwesto human sa ilang makutas nga kada­ugan batok sa defending champions University of Cebu (UC) Webmasters sa miaging gabii sa Cebu Schools Athletic Foundation Inc. (CESAFI) college division sa Cebu Coliseum.

Nagpasabot kini nga inig ka human sa elimination round, moderetso na’g abante sa semi-finals ang Green Lancers ni coach Felix Belano i­­sip ilang benepisyo sa pagkahimong no.1 team.

Bisa’g unsa pay resulta sa katapusan nilang duwa, dili ra maapektuhan ang Green Lancers, nga ningsaka sa 5-0 nga baraha.

Sa ilang bahin, ang Webmasters ni coach Rhoel Gomez nahagsa sa 2-3 nga baraha.

Ang mga three-point shots ni Eman Calo mao ang nag-agak sa Green Lancers sa panahon nga gihudlat na sila’g maayo sa Webmasters sa krusyal nga bahin.

Sa pagpangulo ni Brian Heruela, ang Webmasters ningbangon gikan sa pagkalubong ug nakaposte pa sila’g 72-69 nga labaw sa nahabiling kapin sa 6:00 minutos.

Human niini, nakakompleto og four-point play si Calo nga gisundan og duha ka freethrows ni Phil Mercader aron hatagan ang Green Lancers og 75-72 nga labaw.

Misikit na sab ang Webmasters, 74-75. apan nagpabuto na sab og three-point shot si Calo aron hatagan ang Green Lancers og 78-74 nga labaw sa nahabiling 4:28 minutos.

Sikit na gyud kaayo ang kombati gikan niadto ug naseguro lang sa Green Lancers ang kadaugan dihang nakapuntos na sab og tres si Calo nga maoy nagposte sa final score, 85-80, sa nahabiling 7.6 segundos.

Si Calo nimugna og 21 puntos aron pangulohan ang kadaugan lakip na niini ang unom ka three-point shots samtang nidugang og 17 puntos si Vincent Mendoza.

Ang Webmasters gipangulohan ni Heruela pinaagi sa iyang 22 puntos samtang nitunol og 16 puntos si rookie Kido Cabrera.

Sa high school division, ang Sacred Heart School-Ateneo de Cebu Magis Eagles ninglampornas sa University of Southern Philippines Foundation (USPF) Baby Panthers, 105-51.