GIPAHIKASAMA sa kapikas ni Captain Jessup Bahinting nga Jesu Kristo ang iyang bana gumikan sa kadaghan sa iyang natabangan.
Si Margarita kinsa emosyonal nga nidawat sa Posthumous Life Savers award nga gikan sa Cebu City government ug gitunol mismo ni Mayor Michael Rama niasoy sa mga maayong buhat sa iyang bana.
“My husband (Jessup) was just imitating (Jesus Christ) because of his great love for God. He was just imitating Jesus Christ. Jesus Christ came to this world to heal the sick, and my husband also was instrument (of healing the sick people).”
Gipasabot ni Margarita mao ang pagkaayo ni Ronaldo Aventurado, zookeeper, kinsa napaakan sa Philippine King Cobra kinsang kinabuhi ‘nagsubay nalang sa usa ka lugas nga lanot’ apan naluwas kay niboluntaryo pagpagamit sa iyang abyon si Bahinting aron makuha ang anti venom sa lalawigan sa Camiguin nga way bugting salapi.
Dugang ni Margarita nga adunay niduol kaniya sa miaging gabii sa haya sa iyang bana ug nagpasalamat nga hingpit siyang naayo sa iyang kidney problem gumikan sa paghatag og tabang pinansyal ni Jessup alang sa iyang operasyon.
Gisaysay usab niya ang bana ug asawang Lañujan kinsa adunay problema sa panan-aw ug hingpit kining naayo gumikan sa tabang sa nitaliwang piloto.