Renato S. Pono, Sr.
Mantuyong, Mandaue City
SUKAD gibuwagan si Ivan sa iyang uyab nga lalake, kanunay na niya ikuyog si Clody, ang tomboy sa ilang dapit. Bisan asa sila manuroy magabii, tagdugay silang mamauli. Pulos sila moinom og ilimnong makahubog. Sa ngadto-ngadto nagkauyab gayud ang duha. Kanunay na silang mag-holding hands nga manuroy.
Apan niabot ang adlaw nga sila nagka pangka-pangka. Unsay ilang gastuhon sa inadlaw nilang panginahanglan? Pulos sila way klarong trabaho ug way kahinguhaan.
Usa ka hapon nagkita silang Ivan ug Patrick. Suod sila kaniadto. Bisan minyo ug may mga anak si Patrick, mogawas gihapon ang iyang kahigal sa mga babaye. Si Ivan nga bigot pa sa kasing ang lawas, may tinaguang pagbati ngadto sa lalake. Mikuyog si Patrick sa pinuy-anan nilang Ivan. Iyang gipaila-ila si Clody nga bag-o niyang uyab ug kaipon. Ug nag-inom silang tulo nga may sumsoman.
Tapos sa ilang inom gibinlan silag kuwarta ni Patrick. Labihang lipaya sa duha. Nigaan ang ilang problema.
Gikan niadto welcome na kanunay si Patrick sa duha.
“Clody,” ni Ivan, “ang pagsige og anhi ni Patrick morag dunay laing kahulogan.”
“Unsay buot nimong ipasabot, Ivan?” ni Clody.
“Kon mangulitawo si Patrick nako, okey ka ba?”
Morag natuk-an si Clody kay dugay nakatubag. Lawom ang iyang gihunahuna.. “Okey ra tingali, Ivan, apan ayaw gyud kog biyai!”
“Dili ko ikaw biyaan, Clody. Dili kana mahitabo kay dakong minyo si Patrick ug may mga anak pa.”
APAN nagkahigugmaay gyud silang Ivan ug Patrick. Way angal si Clody sa higayon nga dad-on ni Patrick si Ivan. Nalipay ra pod si Clody kay binlan man siyag kuwarta ni Patrick. Nakabalik hinuon si Clody sa karaan niyang bisyo – ang pagsuyop og shabu.
Unya miabot ang adlaw nga maoy gikahadlukan ni Clody. Kanunay na sila si Ivan maglalis bisan sa way klarong hinungdan, hangtod nga kini mosangpot sa ilang panag-away.
“Mopauli na ko sa amo, Clody,” ni Ivan nga namutos sa iyang mga sinina.
“Imo diay kong biyaan? Maayo pay …” Wa matiwas ni Clody ang buot niyang isulti kay miluom siya paghilak. Dako gyud ang iyang gugma kang Ivan. Mamatay gyud siya kon mawa si Ivan sa iyang kiliran.
Bisan sa pakimaluoy ni Clody midayon gyud pagbiya si Ivan kaniya. Ug kini gikaguol kaayo ni Clody.
Usa ka sayong buntag niana, nakit-an na lang si Clody sa iyang manghod nga nagbitay sa puwangki sa ilang balay. Wa nay kinabuhi. Wa madugay miabot si Ivan nga naghilak ug nagdanguyngoy. Nakita ni Ivan ang kamisin nga maoy gisul-ob ni Clody nga may marka: ADYOS, MAHAL KO! Panamilit ni Clody kang Ivan kinsa lubos niyang gihigugma. (KATAPUSAN)