USA ka ginang ang mireklamo sa kapulisan human alegasyong gikulata sa bise presidente sa usa ka eskwelahan kay mireklamo siyang mahal kaayo ang libro sa iyang anak alas 10:00 sa buntag niadtong Sabado.

Base sa blotter sa San Pedro Police Station, gikulata mao si Natalie Paulino Peran Valera, 41, minyo ug nagpuyo sa Alpha Homes, Matina Aplaya, siyudad sa Davao.

Nasayran nga nahitabo ang pagpangulata sa opisina sa St. Albans College of Technology nga nahimutang sa dalang CM Recto, ning siyudad.

Moadto ang ginang sa tunghaan aron moreklamo unta tungod kay mahal kaayo ang module sa iyang anak nga nagkantidad og P500.

Tungod sa maong reklamo, kalit siyang gikulata sa usa ka alyas Bambi nga mao ang bise presidente sa tunghaan hinungdan nga nabun-og ang iyang kalawasan.

Gipadangat na sa kapulisan ang maong reklamo sa barangay aron mahusay sila.

Wa pa sab makuha sa SuperBalita ang tubag sa tunghaan bahin sa reklamo. (Blue Cordero)