GIPADUNGOG ang asawa sa iyang bana nga nakig-phone sex kini sa iyang kabit nga nars nga atua nagtrabaho ngadto sa gawas sa nasod.
Dihang nasakpan sa asawa ang gibuhat sa iyang bana gipakita pa gyod siya sa hulagway sa kabit niini nga anaa sa cellphone ug wa makontento giingnan siya nga “gwapa kaayo akong kabit no?”
Niini, ang asawa nipasakag kasong kalapasan sa Republic Act (RA) 9262 kon Anti-Violence against Women and Children Act sa iyang bana nga atua karon nagtrabaho sa Bahrain.
Ang Cebu Provincial Prosecutor’s Office nirekomendar nga ang bana mag-atubang sa naasoyng kaso sa korte ug mamahimo siyang makapiyansa sa kantidad nga P24,000 alang sa iyang temporaryong kagawasan samtang husayon ning kaso.
Nalatid sa RA 9262 nga di pwedeng mahisgutan ang biktima ug suspek nga nalambigit ning kaso.
Si Maria (tinuod nga pangalan gipugngan) nisaysay sa iyang affidavit nagminyo sila sa iyang bana niadtong 2006 kinsa nagtrabaho kini sa Bahrain isip welder ug aduna silay duha ka mga anak.
Nitataw siya nga sa pipila ka tuig sa ilang pagpuyo nagmalipayon sila apan niadtong 2010 nagsugod na kinig aslom kay nagduda siya nga may lain kining babaye gawas kaniya.
Ang iyang pagsuspetsa natukma gyod kay niadtong Oktubre 2010 nakabasa siyag text message sa cellphone sa iyang bana nga gikan sa babaye niini. Ang kabit sa iyang bana nagtrabaho isip nars nga nagbase sa Bahrain. Gawas niini, nakadungog usab siya sa iyang bana nga nakig-phone sex sa iyang kabit ug nakakita mismo sa hulagway niini sa cellphone.
Dihang iyang gikomprontasi ang iyang bana kabahin sa hulagway nga iyang nakit-an nanghambog pa kini nga “gwapa kaayo akong kabit no?” Nidugang siya nga ang kabit sa iyang bana matag adlaw motawag kaniya ug pakusgan pa ang loudspeaker sa cellphone sa iyang bana aron makadungog siya sa ilang gisultihan.
Dinhi nagsugod ang ilang away nga niresulta nga giminusan ang suporta sa iyang mga anak gikan sa P18,000 ngadto na sa P5,000.
Apan, nakapasamot niyag kalisod kay didto kini gipadala sa mga ginikanan sa iyang bana nga nagbase sa Antique.
Nipadayag siya nga bisag nakadawat siyag insulto gikan sa ginikanan sa iyang bana naningkamot siyang makuha gyod ang kwarta alang sa iyang mga anak ilabi nang naputos na siya sa utang.
Ang suporta nga gipadala niini busa ning-adto siya sa Overseas Workers Welfare Administration (OWWA) aron magpatabang siya sa iyang problema apan wa gihapon siyay nahimo ug nisamot kay di na niya makontak kini kay nag-ilis og laing numero sa cellphone.
Subay niini, nidangop siya sa kapulisan aron ipa-blotter ang insidente hinungdan nga napasaka ning kaso sa piskaliya.
“In the instant case, the evidence on record sufficiently established that respondent provided insufficient financial support to complainant and their children, which causes mental or emotional anguish on the part of the complainant,” tipik sa resolusyon sa piskaliya busa girekomendar nga paskahag kaso.