MOKABAT sa P1 million nga kantidad sa marijuana gidauban, 65 ka sakong pirated DVD/CD ug pito ka video karera machines ang gipangdugmok kagahapon sa buntag atol sa pagsaulog sa ika 33 katuig nga founding anniversary sa Cebu Provincial Police Office

(CPPO).

Si Sr. Supt. Patrocinio Comendador, direktor sa kapulisan sa lalawigan sa Sugbu, maoy nangulo sa kalihukan uban kang Gobernador Gwendolyn Garcia Sr. Supt. Orlando Ualat, chief of staff sa Police Regional Office (PRO-7) ug PDEA-7 director Jigger Montallana.

Si Garcia mipalanog sa iyang hugot nga suporta sa kapulisan sa lalawigan sa Sugbo tungod sa ilang maa­yong binuhatan labina sa ilang kombate sa bisan unsang mga kremin, sa anti-illegal drugs campaign diin number 1 ang CPPO ug gipasidungan sa lukop nasud.

Gipadangat niini ang pasalamat sa CPPO tungod kay ilang namintenar ang pagpatuman sa kahapsay ug kalinaw ug napakunhod ang kremin og 30 pors­yento karong tuiga.

Si Ualat, sa iyang bahin, nipadangat sab sa iyang pasalamat sa lokal nga kagamhanan sa non- governmental organization (NGO) sa ilang suporta sa PNP.

Si Comendador nipadayag sa iyang kalipay nga ang ilang kahago na-recognize human sila maoy napiling best sa tanang police office sa lukop nasud dihang nahatagan og award isip best in anti-illegal drug operation.