GIPASABOT ni LA Tenorio nga pangandoy gyud niyang makatabang og dako sa national team nga molampos sa dakong international tournament.
Mao kini ang gipabuhagay ni Tenorio sa iyang pagbalik sa nasod kauban ang tibuok puwersa sa Smart Gilas Pilipinas nga nahimong kampiyon sa prestihiyusong 34th William Jones Cup sa Taiwan.
Si Tenorio maoy nahimong bayani sa kadaugan sa Gilas batok sa USA squad, 76-75, nga maoy nakapahimong kampiyon sa mga Pinoy.
Ang labing mubong sakop sa Gilas maoy nangulo sa kadaugan dihang namugna niya ang nakapadaog nga puntos sa nahabiling 17 segundos. Nimugna og 20 puntos si Tenorio sa maong duwa, 11 niini iyang gimugna sa 4th quarter.
“This is a dream for me though I’ve been part of the national pool that played in the Jones Cup before,” batbat ni Tenorio sa interbyu sa AKTV.
Dili sama niadtong 2006 sa una niyang pagduwa sa Jones Cup, si Tenorio mao na ang sinaligang pointguard ning higayuna ug wala niya giusik ang pagsalig nga gihatag ni coach Chot Reyes ngadto kaniya.
Si Tenorio maoy napiling MVP sa kompetisyon.
“It’s a good feeling but we still have a long way to go. This is just one of the minor tournaments in preparation for FIBA Asia championships next year,” asoy ni coach Reyes.
Si Reyes misaysay usab nga permi silang maglisod sa tanan nilang duwa ug makahuygo lang sila sa katapusang quarter. ”Grabe ang puso ng mga players natin. We don’t have most of the superstars in the PBA but these players really know how to play as a team.”
Ang ubang mga miyembro sa Gilas mao sila si Marcus Douthit, Ranidel de Ocampo, Larry Fonacier, Sonny Thoss, LA Tenorio, Mac Baracael, Jeff Chan, Gabe Norwood, Rico Villanueva, Gary David, Sol Mercado, JayR Reyes, Matt Rosser, ug Garvo Lanete. (Sherly Joy C. Pasaylo, SWU Mass Comm Intern)