GIKATAHO nga nagkauyon na ang matag kampo nila ni 8-time world champion Manny Pacquiao ug Mexican Juan Manuel Marquez sa usa ka inisyal nga kasabutan kabahin sa No­biyembre 10 nga away.

Basi sa usa ka kasaligang tinubdan sa www.fightnews.com, giingon nga miuyon si Marquez ug ang handler niini nga mao ang Zanfer Promotions sa inisyal nga tanyag sa Top Rank alang sa ikaupat nga panagharong sa duha ka mga boksidor.

Matod pa nga wala nay intensyon si Pac­quiao nga bawion ang World Boxing Organization (WBO) welterweight title nga gii­log ni American Timothy Bradley pinaagi sa kon­trobersyal nga split decision nga kadaugan.

Mas gihatagan karon og gibug-aton ni Pacquiao ang posibleng panagharong nila i Floyd Mayweather Jr. sa sunod tuig.

Sa dili pa siya makigharong kang May­­weather, gikataho nga misanong ang Pam­bansang Kamao sa Pilipinas nga makig-away pagbalik kang Marquez.

Si Marquez, kasamtangang World Boxing Association lightweight champion ug WBO super lightweight champion, maoy giingong nakahatag og grabe ka lisod nga away ngadto kang Pacquiao.

Kaduha man tuod gipilde ni Pacquiao si Marquez unya ang lain nilang usa ka away miresulta sa panagtabla, masuta nga maglisod gyud si Pacquiao sa estilo ni Marquez.

Daan na sab gipasabot ni Top Rank boss Bob Arum nga mikita og dako sa pay-per-view ang tulo ka kontrobersyal panag­harong nila ni Pacquiao ug Marquez hi­nung­dan nga aduna gyud siya’y interes sa ikaupat nga away.

Apan sa laing interbyu, gipabuhagay sa adviser ni Pacquiao nga si Michael Koncz nga wala pa gyu’y katinuan ang tanan kon kinsa ang sunod nga makontra sa Pambansang Kamao sa Pilipinas.

Gawas nila ni Marquez ug Bradley, ang laing boksidor nga gikonsiderar nga iparang kang Pacquiao karong Nobiyembre 10 mao si Puerto Rican Miguel Cotto.

“This involves some very calculated business decisions, so I am planning on mee­ting with Bob again this evening in Los Angeles, and the dates are still open,” asoy ni Koncz sa interbyu sa www.ringtv.com.

“We haven’t committed to a date and we haven’t committed to an opponent.”