CENTRAL MINDANAO -- Gatusan ka pamilya gikan sa Sarangani province ug General Santos City ang apektado sa pagbaha mugna sa kusog nga pag-ulan sukad alas 7 sa buntag niadtong Miyerkules tungod sa low pressure area nga nasiplatan sa may Surigao del Sur.
Sa Alabel, gibaha ang mga barangay nga Bagacay ug Ladol kon diin sobra sa 100 ka mga molupyo ang apektado.
Nadaut sab ang pipila ka ektarya sa humayan sa Barangay Kawas, human sa grabeng pagbundak sa ulan.
Sa General Santos City, apektado sab ang daghang panimalay tungod sa pagbaha sa mga barangay sa Lagao ug Bula.
Tungod sa pagbaha, gikansela ang klase sa Datu Acad Dalid Elementary School sa Barangay Baluan sa dakbayan.
Wala hinuoy gitaho nga mga molupyo nga namakwet apan padayon ang pahimangno sa Office of the Civil Defense nga mag-amping sa landslisde ug dugang pagbaha mugna sa low pressure area sa Mindanao.
Nagpadala na sab og hinabang ang mga lokal opisyal ngadto sa mga biktima sa baha. (Edgardo Fuerzas)