ANG Davao City athletics tim ug ang Crossing Bayabas National High School (CBNHS) maoy nanguna sa 27th Kadayawan Sports Festival Athletics Competition niadtong Dominggo didto sa Davao City National High School (DCNHS).
Mitala og 99 puntos ang Davao City athletics tim aron makuha ang titulo sa 14-above team batok sa University of Mindanao (UM), CBNHS ug DCNHS nga nabutang sa sunod nga tulo ka puwesto.
Mihimo ang UM og 97 samtang ang CBNHS ug DCNHS dunay 53 ug 26 sa maong han-ay.
Samtang ang CBNHS mi-iskor og kinatibuk-ang 120 puntos aron masungkit ang korona sa U13 team kontra sa Team Piedad ug Kapitan Tomas Monteverde Elementary School (KTMES) nga mitala og 119 ug 41 sa maong puwesto.
Ang kalihukan gitugotan sa Philippine Amateur Track and Field Association ubos ni tournament director Belen Taala.
Ug kini gipresenta sa lokal nga panggobyerno sa Dabaw pinaagi sa Sports Development Division sa City Mayor's Office. (Marizz S. Robilla)