GRABE ang kasakit nga gibati sa mga ginikanan ni Jeffrey Abusejo Jr. tungod sa iyang kamatayon human gilambos sa ilang silingan nga si Kienner Baller, drug addict nga kanhi seaman.

Gihakop sab sa kahadlok ang mga ginikanan sa batang babaye nga gi-hostage sa ilang silingan nga adik sa may Sityo CRCI, Brgy. Apas, dakbayan sa Sugbo.

Ang duha ka mga suspek sa mao nga mga hitabo pulos gituohan nga nalisoan sa ilang tornelyo tungod sa pagkagumon sa drugas.

Di baya ni unang mga hitabo. Daghan nang linu­og nga mga krimen dinhi sa Sugbo ug ubang mga dapit sa nasod nga gihimo sa mga drug addict.

Mga krimen nga mahimo lang sa usa ka tawo nga wa sa maayong panghuna-huna, sama sa nahitabo kang Jeffrey.

Kinsa man nga tawo ang molambuyog ug molambos sa usa ka 2-anyos nga igo lang nakagsaghid sa usa ka tawo samtang nagduwa?

Apan kay naapektuhan na ang pangutok ni Baller sa drugas, iya kadtong nabuhat.

Ang nakapait kay mahimo kining depensa unya sa iyang kaso tungod kay mahimo man siyang makalingkawas kon mamatud-an nga wa siya sa kaugali­ngon dihang nahitabo ang krimen.

Ingon niini ang kagrabe sa hulga sa drugas diha sa komunidad. Apan subo kaayong huna-hunaon nga nilipang og maayo ang illegal drug industry bisan sa gipasiatab nga kampanya sa kapulisan.

Unsaon man gud, ang kampanya kuwang o taphaw ra kaayo, kay sagad ini pang-press release lang.