MIBIYA na sa partido Padayon Pilipino si Misamis Oriental first district Representative Peter “Sr. Pedro” Unabia.

Kini ang gikumpirma ni Cagayan de Oro City Mayor Vicente Emano sa atol sa iyang sinemanang programa sa usa ka sibyaan sa radyo.

Gibutyag sa mayor nga nagpasilong si Unabia ubos sa Liberal Party (LP). Apan gitataw sa mayor nga maayo na unta ang plastada apan natay-og tungod sa pag-uban ni Unabi sa LP ug wala siyay mahimo niini tungod kay katungod kini ni Unabia nga mobalhin.

Giangkon sa mayor nga sa gihimo ni Unabia, normal nga maapektuhan ang ilang partido labina gyud ang iyang anak nga si Congressman Bambi Emano, kinsa naninguha nga magpapili isip gobernador sa Misamis Oriental batok kang kasamtangan Bise Gobernador Norris Babiera.

"Apektado ko labina kay imcumbent siya, maayo, daghan og kwarta. Akong naluy-an si Bambi wala siya nakaatubang in-ani, nabalaka mi nga maapektuhan apan akong naobserbahan bisan og kabagito pa niini sa politika apan wala man sab intawon apan dayag apektado siya," butyag sa mayor.

Dugang sa mayor nga sa kalit nga pagbiya ni Unabia naapektuhan ang ilang linya ug uban pa tungod kay daghan ang nag-umol niini.

Dili pa mabutyag sa mayor kung kinsa ang linya sa Padayon Pilipino nga magpapili ug iya ra kining ipahibalo sa umaabot nga panahon.

Gibutyag niini nga sa kinatikbuk-an ang katawhan lang gihapon ang maoy magbuot unsa ang tinuod niini.

Samtang ang City Comelec Board nag-dismiss na sa Opposition sa Transfer of Registration ni Oscar Moreno ning siyudad sa Cagayan de Oro ug niadtong Miyerkules giaprobahan na pagbalhin sa iyang registration ni Moreno ug mahimo na kining botante ug magpapili sa umaabot nga eleksyon.

Dihang gipangayoan ug reaksyon si Emano kalabot niini, gibutyag niini nga kahibalo na siya nga ang maong mga petisyon sa pipila ka mga tawo ug mibabag sa iyang pagparehisrto ni Moreno ang dili gyod magmalampuson tungod kay katungod sa bisan kinsa ang magparehistro.

Apan susama sa gibutyag niini nga tungod kay mibiya na sa probinsya ang gobernador, angayan na usab kini mu-resign sa iyang katungdanan basi sa nakalatid sa balaod.

Samtang sa laing kalamboan kalabot sa politika, gipahibalo usab ni Emano nga wala na siyay mahimo sa pagdeklara ni Konsehal Ian Mark Nacaya nga magpapili isip kongresista sa ikaduhang Distrito sa Cagayan de Oro kontra kang incumbent Rufus Rodriguez.

Gipasabot sa mayor nga suportado niya ang pagpapili ni Nacaya sa maong posisyon.