Martin: `The Mistress’ grabe kakusog

AC Martin

Tagming

Puwerte gyung kusoga sa “The Mistress.” Sud lang sa lima ka adlaw nikita dayon ni og kapin sa P100-million.

Ang “The Mistress” mao pa lang ang ikaupat nga Pinoy movie karong tuiga nga nakaabot og kita nga P100-million. Ug dili imposible nga moabot pa nig P200-million kay mag-usa pa man lang ni ka semana.

Siyempre nakakita na ko. Unsay ending? Patay si Ronaldo Valdez kay giatake sa kasingkasing. Although duna siyay mga inconsistency apan way dudang usa ni sa mga pinakabug-at nga pelikula nga nahimo sa John Lloyd-Bea tandem.

Mga pahalipay sa Star Cinema, ilabi na sa ilang kugihan kaayong promotor, Ms. Josie Pereyra nga maoy nagpaluyo sa mga promo tour ug mall shows sa Visayas ug Mindanao, ingon man sa Metro Manila.

LAYSHO ANG FANS

Lingaw kaayong nipaambit sa iyang kasinatian ang Superbalita Sports writer nga si Erwin Lirazan atol sa “Kawanangan” album launching sa Missing Filemon niadtong Sabado sa Handuraw.

Wa siya magtuo nga laysho diay kuno kaayog mga fans ang Missing Filemon. Imbes moreklamo sila kay nangapiit, wa na lang kay sagad kuno sa nihugop mga sexy ug mestisang kolehiyala.

Apan medyo emosyonal kuno ang bokalistang si Insoy Niñal kay duha sa ilang mga sakup lumalargahay na sa abroad.

Kaubang nanan-aw ni Erwin ang iyang mga `87 high school batchmates sa Southwestern, diin kabahin sad sa maong batch si Insoy.

Ugma, basaha ang atong Super Ka! kay daghan og rebelasyon si Insoy, sama sa paghinay sa bisrock ug sa pagbag-o nila karon sa ilang sound. Kitakits!