SECTIONS
Friday, November 16, 2018
BACOLOD

Serna: Mga artista nibisita ug mobisita pa sa Sugbo

DI ikalimod nga malampuson ang pagpili sa Mr. & Ms. Press Freedom 2012 nga gipasiugdahan sa E-Group ug gipadagan sa Wicked Sisters (Anna Maris Igpit, Karla Henry ug Sian Maynard) inabagan sa crew sa GMA 7 Cebu nga gihimo sa Highlights sa Harold’s Hotel.

Nipasundayag ang La Diva ug nitambong sila si Andrea Torres ug Mikael Daez nga pulos taga GMA 7. Mga pahalipay sa mga mananaug: Ed Buenaviaje (Cebu Daily News) ug Grace Lacamiento (The Freeman) ingon man nila ni Davinci Maru (Sun.Star, runner-up) ug ni Carmel Matus (CDN, 1st runner-up), Katreena Bisnar (KBP, 2nd runner-up) ug Cheska Geli (Sun.Star, 3rd runner-up).

Na-pressured ang E-Group nga palabwan kini sa sunod tuig. Paningkamutan.

***

Nganong way turnover sa Ms. Press Freedom (way Mr. duha na ka tuig)? Miingon si Phoebe Kaye Fernandez nga wa kuno siya pahibaw-a sa layo pa mao nga nakadawat siyag laing buluhaton.

Wa matagbaw ang taga E-Group kay isip sakop sa Cebu media, angay siyang mahibalo sa mga kalihukan apil na ang iyang katungdanan isip gumagawas nga rayna. Anà.

***

Sa usa sa mga kalihukan sa Press Freedom Week, namatikdan nga naigo sa giinom ang lalaking emcee mao nga nisamot kini katabi-an ug nakapainat sa programa. May wa mahimuot sa iyang mga tiaw nga sa primero medyo ni-click, pero tungod sa pagsigeg balik ug tungod kay naghisgot kinig edad (gani gisigeg hisgot niini nga naa na sa ‘panapos’ nga estado ang gikomedyahan) ug hitsura, dunay miyamiid nadugay.

Wa may makabuot sa naggunit sa mikropono pero unta, magbantay usab kini sa pag­libkas sa iyang baba. Angay lang.

***

Miari diay si Sarah Geronimo sa Sugbo aron paglingaw sa mga suki sa Cebuana Lhuillier nga nagsaulog sa ika-25 nga kasumaran pinaagi sa konserto nga Pistahang Cebuana! Guests ni Sarah sila si Mark Bautista ug Eric Santos nga mikantag mga solo numbers.

Ang trio nila sa kanta ni Freddie Aguilar nga Anak nga gisal-utan og Binisaya mao ang nakadawat sa labing kusog nga pakpak. Kon wa pa lang isal-ot-sal-ot ang mga pakigpulong, ripa ug video show, di tingali mabaraw ang kasadya matag karon ug unya.

***

Mipahibalo ang Moonwalk Cebu nga ugma, Sept. 22, himoon ang elimination round sa Campus Idol Season 3 sa Robinson’s Fuente activity area sa alas 3 s.h. Ang magtigi mao sila si Stella Marie Codilla (St. Paul College), Maricar Labado (Cabangcalan NHS), Jessa Abaquita (Talisay NHS), Cleford Misoles (Tayud NHS), Alden Asehan (CTU), Sheila Bucog (USJ-R), Jhon Peterson Villarin (SWU), Jose Gomora Jr. (SWU), Kiery Segayle (UC-Main), Kim Shanen Abadilla-Samantha Abadilla (USJ-R), Eloiza Loryn Invento (MCSA), Majolica Santos (Sto. Niño Montessori), Gerlyn Abano (Abellana NHS), ug Genevive Cacinillo (Babag NHS).

Ang grand finals himoon sa Okt. 6, sa alas 3 s.h. sa mao gihapong lugar. Saksihi!

***

Magsaulog diay sa ika-19 nga kasumaran ang Gaisano Country Mall ug syempre, may mga artista nga mopasundayag. Sa Okt. 6, sila si Divine Smith ug Tintin Patrimonio anha sa mall sa alas 8 s.g. Kini human sa ilang pasundayag sa Balamban sa grand draw sa Sakyanang Pangnegosyo.

Sa Okt. 20, ang mga artista sa Aryana nga sila si Dominique Roque ug Bianca Manalo na usab ang mopasundayag sa mall sa alas 8 s.g. human sa pasundayag sa Gaisano Main sa alas 6:30 s.g.

Sa Okt. 31, si John Medina (Walang Hanggan) ug Sofia Andres (Princess & I) na sab ang molingaw sa mga motambong sa paglunsad sa Christmas Promo sa Gaisano Main (6:30 s.g.) ug sa mall (8 s.g.). Saksihi na sab! Anà lang.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!