RADIO block timer ug TV host sa usa ka television network sa Sugbo nga modagan pagka gobernador sa lalawigan sa Sugbo sa nagsingabot nga eleksiyon sunod tuig ang unang niduso og certificate of candidacy sa Commission on Elections Provincial Office kagahapon sa buntag.
Samtang laing kandidato nga way trabaho nga taga lungsod sa Barili ang gusto usab nga mag-gobernador.
Si Roliveth Cortes alyas Klasmit Boyet, radio block timer sa dyAB ug TV host sa ABS-CBN nga nagdala sa programa nga maghisgot unsaon pagpamuhi og manok ug baboy, ang gusto maghatag og kausaban sa natad sa pulitika sa Sugbo pinaagi sa transparency ug
accountability.
Nisang-at siya sa iyang COC alas 11:18 sa buntag isip usa ka independent candidate pagka gobernador kauban sa iyang mga tigpaluyo.
Matod niya wala na siya magkinahanglan og dako nga makinarya sa pagpangampanya tungod kay anaa ang iyang mga klasmit o mga listener nga maoy motabang sa iyang kandidatura.
“Suwayan nato, lig-on man kaha mo. Ako way partido nag-inusara ko pero puwede ko mohatag og partida ninyo. It’s partido versus partida... Ang akong partido mga klasmit nako,” padayag niya dihang nahinabi sa mga tigbalita human siya niduso sa iyang COC.