GIREKLAMO ni Cebu Archbishop Emeritus Ricardo J. Cardinal Vidal ang overkill nga estorya ni Bryan Christy nga gimantala sa October edition sa National Geographic nga gi-uluhan og Ivory Worship.
Niya pa, nga maoy gihan-ukan sa tanang sala ug tulubagon sa illegal ivory trade sa tibuok kalibutan si Msgr. Cristobal Garcia nga murag kita na hinuon sa Pilipinas ang numero unong merkado ning maong exotic material nga sa pagkatinuod, wala ra ta’y kumingking sa China apan wala kini gipursige nga angulo kay mas lami man ang pagbagnos sa simbahang Romano Katoliko sa iyang gipintal nga kasal-anan.
Dili tinuod nga si Msgr. Garcia ang nagtudlo sa reporter nga Kano kun unsaon sa pag smuggle ning maong mga reliko nga ginama sa ivory paingon sa Estados Unidos kay posibleng didto nakuha ni Christy kining maong impormasyon sa ubang mga sources apan didto niya gipansangil kang Msgr. Garcia.
Unya bisan og wala na’y labot pa sa ivory trade, misiwil gyud ang sensationalism nga istilo ni Christy kay gi-ukay man niini pag-apil ang sex abuse cases ni Msgr. Garcia sa California nga unta dul-an naman sa duha ka dekada ang milabay sukad sa pagpanghitabo niini.
Sukwahi usab sa gipatoo, wala midagan ug gi-expel si Msgr. Garcia sa Dominican Order kon dili gitugutan siya nga mo-withdraw sa congregation aron makapangita og laing assignment.
Sa iyang bahin, gitubag ni Christy pinaagi sa iyang Oktubre 2 nga blog ang pagsaway ni Cardinal Vidal sa iyang report. Niya pa, nga gusto siyang ipadeklarar nga persona non grata tungod sa iyang gisuwat nga estorya nga siya namakak sa iyang interes sa religious devotion aron lamang makakuha og impormasyon. Kay makita og mabasa man sa mao niyang sinuwat ang iyang pagpaningkamot sa pagsabot sa pagtoo sa atong kaliwatan.
Dinhi, mamahimong point of comparison ang gipagawas nga posisyon ni Archbishop Jose Palma diin categorical niining gipahibawo nga ang simbahan ang ciento porsiyento nga mosuporta sa ivory ban og boluntaryong mo-submitir sa imbentaryo sa tanan nilang mga reliko. Apil ang pagsubmitir sa imbestigasyon sa hingtungdang mga ahensiya sa gobyerno.
Ang mga Griyego adunay panultihon nga gikulit sa templo sa Delphi nga ‘medan agan’ kun nothing in excess. Nga ang tanang butang sa kalibutan bisan og unsa pa kamaayo kun masobrahan ang magmugna gyud og dili maayong epekto. Kini nagpahinumdum usab sa gisulti sa mga migranteng intsik dinhi sa ato nga ‘daghang estorya, daghang sayup’.