SULAYAN sa Systems Technology Institute nga madepensahan nila ilang titulo sa pagabri sa 2015 Cagayan de Oro Basketball Federation (CDOBF)-Philippine Collegiate Champions League (PCCL) city elimination karong adlawa nga pagadulaon didto sa host Mindanao University Science and Technology (MUST) Gymnasium.
Ang STI Olympians ni coach Boy Dacoco mao ang nagrepresentar sa niaging tuig nga CDOBF city elimination human nila maparot ang Southern de Oro Philippines (SPC) Sharks sa finals.
Apan, makatagamtam og dakong suliran ang Olympians ni Dacoco tungod nga halos bago ang iyang linya sa team, diin si Norvhel Lerio nalang ang nabilin nga saligando.
“Hinaut nga naka-gelling na ang mga bago nako nga players,” ingon ni Dacoco.
Maengkwentro nila ang Lourdes College sa kataposang dula karong adlawa.
Di sab makompyansaan ang Xavier University (XU) Crusaders ni coach Rocky Calingin kay ila napilde ang Olympians sa ilang kulbahinam nga best-of-three finals sa Loyola Cup ning tuiga.
Maatbang sa Crusaders ang host MUST sa unang dula karong adlawa.
Dula karon sa MUST:
10 a.m. MUST vs XU
1 p.m. Liceo vs SPC
2 p.m. PCC vs CU
3 p.m. Lourdes vs ST
Dula ugma (wala pay venue gianunsyo)
8 a.m. XU vs CU
9 a.m. Liceo vs Lourdes
1 p.m. MUST vs PCC
2 p.m. STI vs SPC