NITUMAW ang mga kaso sa demonic possession, sa pagsud sa dautang espiritu, sa mga estudyante sa Jaclupan National High School sa siyudad sa Talisay.
Sumala sa mga paghulagway sa mga balita ang mga tinun-an nga nasudlan sa dautang espiritu nawad-an sa panimuot ug nagkombulsyon.
Morag susama sa horror movie nga “The Exorcist” niadtong tuig 1973, diin usa ka 12-anyos nga batang babaye nga gidala ni Linda Blair nasudlan sa dautang espiritu nga gipalayas sa duha ka pari pinaagi sa exorcism.
***
Napugos si Jaclupan National High School principal Maria Imelda Valde sa pagsuspenso sa klase niadtong Martes, ang ikaduhang adlaw sa demonic possession sa mga estudyante sa maong eskuylahan.
Nibalik silag klase niadtong Miyerkules human misahi ang eskuylahan ni Msgr. Frederick Kriekenbeek, ang official exorcist sa Cebu Archdiocese.
Apan gihakop gihapon sa kahadlok ang mga tinun-an nga mobalik ang dautang espiritu mao nga sa mokabat sa 700 ka mga tinun-an, 20 ray nitunga sa klase.
***
Unsa man kaha ang hinungdan sa maong gitawag nga pagsud sa dautang espiritu sa mga tinun-an sa Jaclupan?
Sumala sa mga taho nahitabo kini human pamutla ang mga kahoy nga bagalnga sa dapit nga gitukoran og usa ka school building.
Apan nganong 17 ra man ka mga tinun-an ug usa ka ginikanan ang gisudlan sa dautang espiritu? Di kaha kadto mass hysteria?
Tingali, magpili sab ning dautang espiritu kon kinsay sudlan.
***
Ang Talisay City Social Welfare Office nihimo na og stress debriefing sa 17 ka mga tinun-an sa Jaclupan National High School.
Si Felipa Solana, social welfare officer sa siyudad sa Talisay, niingon nga gibisitahan sa mga social workers ang panimalay sa 17 ka mga tinun-an ug ilang nasayran ug nasuta ang ilang dakong panginahanglan og hinabang.
Ang rekomendasyon mao nga hatagan og food assistance ang ilang mga pamilya. Bitaw, basin og nahug ni sa panultion nga Tinagalog, “Gutom lang yan.” Pista ra ba karong adlawa sa siyudad sa Talisay, di ba Pare Tiyoy?
***
Ang pelikula nga “The Exorcist” gihimo sa kantidad nga $12 milyunes apan nikita sa takilya og kapin sa $441 milyunes.
Daghang nanan-aw sa salida kay makahadlok man. Apan ang nahitabo sa Jaclupan tinuod
mao nga daghang wa mo-eskuyla.
Tingali nagkinahanglan pa og dugang counseling ang mga tinun-an sa Jaclupan, kay kini ra bang gitawag nga demonic possession og pagsud sa duatang espiritu, usahay psychological lang, bunga ra sa huna-huna sa tawo.