LAING mahalong sakyanan ang gikarnap sa wa mailhing carnapper kagahapon dinhi sa siyudad sa Davao.
Ang sakayanan, usa ka kolor Gray Toyota Innova, dunay plate number LHB-816, gipanag-iyahan sa Sumifru Philippines Corporation nga nahimutang sa Pryce Tower, Bajada, ning siyudad.
Ang maong sakyanan nadiskubrehan nga nahanaw alas 8:20 kagahapon sa buntag samtang giparada sa nataran sa balay ni Renante Castroverde, 29, accountant sa Sumifru, nagpuyo sa Vincent Way Street, Vincent Heights, Barangay Angliongto, ning siyudad.
Si Castroverde midangop sa Buhangin Police Station human nadiskubrehan nga nahanaw samtang giparada ang iyang service vehicle.
Sa pagsusi ni Senior Police Officer 3 Joseph Limbaco sa Buhangin Police Station, nasuta nga alas 6:00 sa buntag gikarnap ang sakyanan.
Tungod niini, gialarma na ang tanang estasyon sa kapulisan aron pangitaon ang sakyanan nga nahanaw sud sa area of responsibility sa Buhangin Police Station. (AD)