'Baktin' carnapping group nasikop

UPAT ka mga sakop sa Ryan "Baktin" Yu Carnapping Group ang gipresenta sa mga sakop sa media kagahapon human sila masikop sa Davao City Police Office (DCPO).

Ang mga suspek mao sila Gerry Paulino, 30, nagpuyo sa NHA Buhangin, siyudad sa Davao; Diego Macatimbang, 19, residente sa Sigaboy, Governor Generoso, Davao Oriental; Eddie Lopez, 19, residente sa Balite, Marilog District, siyudad sa Davao ug Hermie Tahom, alyas Loloy, 36, residente sa San Agustin, Surigao del Sur.

Ang mga suspetsado gipresenta ni DCPO director Senior Superintendent Ronald Dela Rosa ngadto kang Davao City Mayor Sara Duterte-Carpio.

"Naluoy ko aning upat ka mga suspek kay biktima lang sila sa ilang lider," sulti sa mayor dihang iyang gisukit-sukit ang mga suspek.

Si Dela Rosa nagbutyag sa mga tigbalita nga una nilang nasikop si Tahom didto sa Tandag, Surigao del Sur.

Suma ni Dela Rosa nga nasikop si Tahom samtang nagmaneho sa kolor Gray nga Toyota Innova, dunay plate number LHB-816, gipanag-iyahan sa Sumifru Philippines Corporation.

Ang maong sakyanan nahanaw alas 8:20 sa buntag niadtong Martes samtang giparada sa nataran sa balay ni Renante Castroverde, 29, accountant sa Sumifru, nagpuyo sa Vincent Way Street, Vincent Heights, Barangay Angliongto, ning siyudad.

Tungod kay dunay Global Positioning System (GPS) device ang maong sakyanan, nasuta nga gidala paingon ngadto sa Tandag, Surigao del Sur mao nga nabawi ang sakyanan ug nasikop si Tahom.

Ang malampuson nga operasyon gihimo sa mga sakop sa DCPO ug Highway Patrol Group (HPG) Davao nga gipangulohan ni Superintendent Gregorio Pimentel.

Si Tahom nagbutyag nga gisugo lamang siya sa iyang amo nga si Ryan "Baktin" Yu, nagpuyo sa Mabua, Tandag.

Ang suspek maoy nagsumbong sa dapit diin nagpuyo sila Lopez ug Macatimbang mao nga nasikop sila sa kapulisan.

Tungod kay nasikop na ang mga kaubanan, boluntaryong mitahan sa kapulisan si Paulino.

Si Paulino nagsulti sa Sun.Star Davao Superbalita nga duha na ka tuig siyang nagtrabaho sa poder ni Yu.

"Sa una, ginasugo lang ko niya nga naay hapiton nga sakyanan. Iyang ihatag ang susi dayon ipadala sa lugar diin niya ipadala," sulti ni Paulino.

Si Tahom nagsulti sab nga tulo na ka bulan siya nga nahimong drayber ni Yu.

"Iya ming gipasaligan nga hatagan og P20-mil, pero tagi-tagi ang iyang paghatag sa amo," sulti ni Tahom.

Si Paulino nabalaka karon sa kinabuhi sa iyang pamilya tungod kay nakadawat siya og bahad gikan sa ilang lider nga Yu.

Ang mga suspek boluntaryong miuli sa Toyota Hi-Ace Grandia nga dunay plate number KDP-5869, Hyundai Tucson nga dunay plate number KFP-842, Honda Fit nga dunay plate number MFH 580, Kia Carens nga way plate number, ug Toyota Innova nga dunay plate numberLHB 816.

Sigun ni Dela Rosa nga dakong sindikato ang Baktin Carnapping Group nga maoy responsable sa pagpangarnap dinhi sa siyudad sa Davao.

1

"Si Baktin may kontak na nag-provide ng susi sa mga sasakyan. Napakabilis ng kanilang operasyon kasi provided ang susi. Basta may tao coming from a car dealer. Hindi lang namin sasabihin kung national o local," sulti ni Dela Rosa.

Giingon sa opisyal nga konektado ang maong tawo sanglit mahatag niya ang yawe sa sakyanan, pangalan ug address sa nakapalit sa target nilang sakyanan.

"Hindi namin masabi, pero ini-imbestigahan pa namin. Maybe in due time, we will present evidences," sulti sab ni HPG Davao director Superintendent Gregorio Pimentel.

Dugang sa opisyal nga daghang mga kontak ang lider sa Baktin Carnapping Group.

"Baktin was inlvolved in carnapping operation. Siya ang nagdadala ng mga carnapped vehicles from Manila," sulti ni Pimentel.

Giingon sab sa nahisgutang mga opisyal nga dunay miguwa nga balita nga dunay mga politiko nga konektado sa mga suspek.

"Nadunggan na namo, pero di na ako nga politiko," pasiaw nga pahayag ni Mayor Sara Duterte-Carpio.

Ang mayor nagsulti nga naluoy siya sa upat ka mga suspek nga biktima lamang sa ilang lider mao nga hatagan iya og proteksiyon.

"Nabalaka mi sa among kinabuhi kay segurado nga nasuko karon si Yu sa akong anak mao nga nangayo mi og proteksiyon sa kapulisan," sulti ni Elizabeth Paulino sa Superbalita.

Kasong paglapas sa Republic Act 6539 ang giatubang karon sa mga suspek samtang gipangita karon ang ilang lider nga si Yu ug lain pang usa.

"Baktin is capable of carnapping operations. He has a system. He is a dangerous person," panapos ni Pimentel.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph