GIBUTYAG ni Davao City Police Office (DCPO) Director Ronald Dela Rosa di na makalihok karon ang Ryan "Baktin" Yu Carnapping Group sa siyudad.
"Di na siya makalihok karon. Napiangan na siya. So, di na siya maka-operate dinhi sa Davao," suma ni Dela Rosa human nasikop ang upat ka mga sakop ni Ryan Yu.
Nasikop mao sila Gerry Paulino, 30, nagpuyo sa NHA Buhangin, siyudad sa Davao; Diego Macatimbang, 19, residente sa Sigaboy, Governor Generoso, Davao Oriental; Eddie Lopez, 19, residente sa Balite, Marilog District, siyudad sa Davao; ug Hermie Tahom, alyas Loloy, 36, residente sa San Agustin, Surigao del Sur.
Sila Paulino, Macatimbang, Lopez ug Tahom nasikop sa kapulisan sa managlahing lugar niadtong miaging adlaw.
Unang nasikop mao si Tahom didto sa Tandag, Surigao del Sur, samtang nagmaneho sa kolor Gray Toyota Innova nga gipanag-iyahan sa Sumifru Philippines Corporation.
Ang pagkasikop ni Tahom maoy hinungdan nga nasikop ang lain pa nilang mga kauban.
Si Dela Rosa nagsulti nga dugay nang naglihok si Yu dinhi sa Mindanao, apan tungod sa pagkasikop sa iyang mga sakop, di na siya makalihok.
"Maglisud pa siya karon mangita og kasaligan nga tawo mao nga di pa siya makapangarnap dinhi," sulti sa direktor.
Si Yu nagpuyo sa Mabua, Tandag, Surigao del Sur, apan duna siyay mga hideout dinhi sa siyudad.
Ang lider sa mga karnaper giila sa kapulisan nga labing mangtas nga tawo nga bisan iyang suod nga higala biktimahon.
Alang sa opisyal, isip pagpangandam, maayo nga dunay garahe ang mga tawo nga dunay sakyanan.
"Kung walay garahe mas maayo nga mo-mata mo inig-ka-ala una sa kaadlawon kay mao nay ilang oras sa pagpangarnap. Inig-ka-alas dos mobalik nalang mo og katulog," pasiaw nga tambag ni Dela Rosa. (AD)