USA sa mga gikalipay namong mga manunulat sa mantalaan mao ang komentaryo, pangutana ug reaksiyon gikan sa mga tigbasa niini.
Sa niaging pipila ka semana, napuno ako sa mga pangutana kabahin niadtong food supplement nga gikan sa 17 ka gamot sa kahoy nga makatambal.
Gipamatud-an nga daghang sakit niini nga maayo apil ang diabetes, asma ug rayuma nga mawagtang sud lamang sa 1-3 ka minuto human kini ihidhid sa nagsakit nga parte sa lawas. Gisulod kining mantika sa gamot sa kapsula nga puwedeng imnon o gamitong panghaplas.
Siyempre bisan kon giaprubar kini sa Food and Drug Administration "No Approved Therapeutic Claim" gihapon ang anaa sa botelya niini. Busa naagni ako sa pagpaambit niining kabahin sa istorya ni Dr. Lai Chiu Nan nga taga-China nga naghimo og pagtuon sa inato nga paagi sa pagtangtang sa bato sa apdo, atay ug kidney. Ingon pa niya nga halos tanang tawo nga may sakit nga kanser seguradong may bato sa iyang lawas - kasagaran sa apdo, pantog, kidney ug atay.
Kitang tanan adunay gallstone o bato sa apdo. Ang pangutana lang kay unsa ka dako? Ang kasagarang timailhan nga may bato sa apdo mao ang pagbati nga miburot ang tiyan o "bloatedness" pagkahuman og kaon ug dili dayon matunawan.
Busa nisugyot si Dr. Lai nga sundon daw ang mosunod nga paagi sa pagtangtang sa bato nga nasuta niyang epektibo.
Sa unang lima ka adlaw, kinahanglan moinom og upat ka baso nga apple juice o mokaon og upat ka mansanas matag adlaw. Kung mahal paliton ang mansanas, puwede tingali moinom og upat ka baso nga pineapple juice o tubig sa butong. Makahumok kini sa gallstone ug sa iyang gitaptan. Normal lang ang imong pagkaon sud sa lima ka adlaw.
Sa ikaunom ka adlaw, ayaw na pagkaon sa panihapon. Pagka-alas 6:00 sa gabii isagol ang usa ka kutsaritang Epsom salt (magnesium sulfate) nga mapalit sa botika, sa usa ka basong medyo init nga tubig ug imnon.
Sublia kini pag-inom pagka-alas 8:00 sa gabii.
Ang magnesium sulfate makaabri sa gallbladder ducts.
Pagka-alas 10:00 sa gabii, moinom og 1/2 nga tasa o 125ml nga olive oil o virgin coconut oil nga may sagol nga1/2 ka tasa nga duga sa lemonsito nga maayo pagkakutaw.
Ang mantika mopadanlog sa gallstone aron dali matangtang sa iyang gitaptan.
Pagka-ugma, makita nimo ang mga berdeng bato nga niguwa kauban sa imong hugaw. Kasagaran molutaw kini sa tubig sa iniduro. Matud pa ni Dr. Lai nga may pasyente siya nga adunay 40-100 ka gagmay'ng bato. Bisan kadtong walay simtomas sa bato sa apdo matingala nga may bato nga mogawas sa ilang lawas. Mas maayo gani nga limpyohan nato panalagsa ang atong tiyan sa daghang toxins gikan sa atong pagkaon sama sa pag-inom og daghang tubig ug pagkaon og presko nga prutas matag adlaw.
Timan-i nga kining tanan tambag lang nako ug "No Approved Therapeutic Claim" gihapon. Mas maayo kung magpahiling sa doktor una magtumar og bisan unsang tambal apil ang herbal. I-text ko sa 0921-5223652 kung naay pangutana o resulta.