DAVAO DEL NORTE -- Ipatuman sa kapulisan sa Davao del Norte Provincial Police Office (DDNPPO) ang "Oplan SumVac" (Summer Vacation) atol ning bakasyon.
Kini aron nga maseguro nga magmalipayon ug luwas batok sa dautang elemento ang katawhan sa ilang paglingaw panahon sa summer.
"Mas lalong dadagsain ang ating mga pampublikong lugar, aliwan at tambayan. Kaya para mapaniguro ang seguridad ng mamamayan, isagawa ng ating kapulisan ang Oplan Sumvac," pagklaro ni Police Senior Superintendent Samuel Gadingan, director sa DDNPPO.
Sumala ni Gadingan nga ipakatap sa matag istasyon sa munisipalidad ug siyudad sa probinsiya ang kapulisan sa mga lugar nga ginadugukan og mga tawo apil na ang mga terminal ug mga malls.
"Kung may problema, andyan lang naman ang mga pulis na pwede kaagad na hingan ng tulong," paneguro ni Gadingan sa katawhan.
Nanawagan usab ang opisyal og kooperasyon sa mga molupyo pinaagi sa pag-amping sa ilang kaugalingon. Pagbutang og tarong nga mga sirado sa mga panimalay kung manglakaw o kaha di na lang unta biyaan ang balay nga walay tawo.
"Kung sa malapit lang naman magliw-aliw. Tulad dito sa Davnor na andyan lang ang mga resort, mas maigi na may maiwan sa bahay na magbantay," tinaw sa opisyal gumikan sa mga kasong pagpangawat sa kabalayan.
Gipabantay sab ni Gadingan ang mga tawo ilabi na kadtong naa sa mga terminal tungod kay daghang pamaagi ang mga kawatan aron nga makabiktima sa mga pasahero.
Ning milabay nga semana, gipatuman sab sa kapulisan ang "Oplan Semana Santa" ug taliwala sa pipila ka mga insidente sa patay ug sumbagay, giilang malampuson ang selebrasyon sa Semana Santa sa probinsiya.
"Sa mga pulis, bantayan natin ang publiko na maging kaaya aya, masaya at safety ang kanilang bakasyon," mando ni Gadingan ngadto sa mga pulis. (Domilyn Ramos-Pico)