SALAMAT sa live streaming sa Sun.Star Online, daw nakasalmot ko sa dakong kalihokan sa South Road Properties (SRP) sa miaging Biyernes nga mao ang Thanksgiving Mass kang San Pedro Calungsod.
Duna man unta akoy pass aron makasulod ug maka-parking ang akong sakyanan duol sa Kawit.
Ako kining gipagamit sa balay kay ako pa mang gidalikyat ang usa ka konsultasyon kuyog kang Sen. Greg Honasan sa Allure Hotel sa siyudad sa Mandaue.
Pagkahuman, didto na ko padulong sa opisina sa PR works sa dalan Sanciangko kay dunay nakaingon kanako nga grabi na kaayo ang trapik sa Mambaling ug sa Labangon.
Diha man gud sa Mambaling nga SRP access ang agianan alang sa tanang mga pedestrian. Mao kini ang agianan sa tanang mga tawo nga walay sakyanan nga dunay passes.
Ang akong pass sa Talisay access man gud busa di gyud makaagi sa access diri sa Plaza Independencia dapit.
Dayon makalibog ug dili mamemorya ang taas nga listahan sa re-routing nga gi-anunsyo sa Citom. Bisan pa man, daghang salamat Joy Tumulak sa Citom sa pag-email sa re-routing advisory.
Bisan pa man, nalipay kaayo ko kay klaro kaayo ang mga hulagway gikan sa Templete diha sa SRP agi sa live streaming sa Sun.Star. Nakakita gyud ko sa moabot nga 1.2 milyones nga mga deboto nga nagpunsisok atubangan sa templete.
Matod pa, nagsugod sa pagpundok ang katawhan sa SRP pagkakaadlawon pa. Ug imbes alas 5 sa buntag nagbutang sa mga barricade ang kapolisan ug ang Citom, mga alas 3 pa kuno, diha na sila.
HONASAN
Gipaabot sa mga representante sa Cebu City-Press Council (CCPC) nga sila si Cherry Ann Lim ug Atty. Ely Espinoza kang Sen. Honasan ang mga baruganan sa media sa Sugbo kabahin sa pipila ka mga balaudnon.
Chairman man gud si Honasan sa Committee on Media sa Senado ug naa karon sa komitiba ang mga balaudnon kabahin sa mga amendment sa Sotto Law ug kini’ng Freedom of Information (FOI).
Ang FOI bill mao ang bersyon sa Ubos Balay Balauranan ug ang sa Senado mao ang POGI kun Public Ownership of Government Information (POGI).
Manghinaot ko nga, basi sa pangagpas ni Honasan, nga kon seryuso silang tanan, malusot dayon kining FOI ug POGI karong Disyembre. Nindot na nga Christmas Gift ninyo sir alang sa mga Pilipino.
(politika2013.wordpress.com)