NAG-INUSARA siya sa ilang grupo nga parehong putol ang tiil apan dili gihapon kini mabintahaan sa kamaayo niya sa paglangoy, gani adunay mga higayon nga malupig pa niini ang normal nga mga atleta.
Ang 19-anyos nga si Jomar Maalam sa Zamboanga del Sur naghatag og inspirasyon sa kadaghanan nga bisan pa man sa iyang kahimtang mamahimo gihapon siya nga molabaw sa normal nga nilalang nga kompleto ang parti sa lawas.
Si Maalam, usa ka gold medalist sa Palarong Pambansa alang sa pagsawom, lakip sa mga ning-apil sa bag-o lang gipahigayon nga Cobra Ironman 70.3 Philippines sa siyudad sa Lapu-Lapu, Sugbo sayo ning buwan.
Niadtong 2013, dihang nalangkat ni Maaalam ang duha ka gold medals sa Palarong Pambansa.
Didto naingganyo ang iyang coach karon nga si Vince Garcia sa Para-triathlon Association.
Tungod kay nagpuyo ang pamilya ni Maalam duol sa dagat mao nga aduna siyay kaalam sa paglangoy.
Siya mao ang ikasiyam sa napulo ka mga managsuon, duha sila nga aduna na’y apan sa lawas gikan sa pagkatawo.
Kasamtangan nga nagtungha sa 3rd year high school si Maalam sa Tabina National High School sa Zamboanga.
Si Maalam, kinsa ubos sa grupo nga “Run Todo” atol sa Ironman, nagdamgo nga mamahimong computer engineer.
Nahuman niini ang 1.9K nga sawom sulod sa 45 minutos diin gipakpakan pa kini sa kadaghanan nga misaksi dihang mitimbakawas kini gikan sa dagat.
Siya mao ang nirepresentar sa iyang grupo sa relay division sa swimming competition.
Si Garcia, maoy coach sa Paratriathlon Association of the Philippines, usa ka organisasyon nga naghatag sa mga para-athletes sa kahigayunan nga makasangka sa nagkadaiyang lumba.
Kasamtangan nga anaa’y tulo ka mga official elite ang maong grupo ug siyam niini ang anaa sa development team kun kadtong nagtuon pa pag-ayo.
Usa si Maalam nga lakip sa development team diin gusto ni Garcia nga dili lang palanguyon si Maalam apan padaganon pa kini ug pabisikletahon.
“We’re planning to train Jomar to bike and run using a special bike and a special wheelchair to do the triathlon on his own,” matod ni Garcia.
Apan nipasabot si Garcia nga gikinahanglan pa gyud og igo nga pagbansaybansay si Maalam aron mahimo kini nga elite bisan paman sa iyang kahimtang.
“But if we give him a year or two, I think he has all the potential because he is hardworking,” asoy ni Garcia, kinsa mihulagway kang Maalam nga mas kugihan kumpara sa normal nga atleta.
Niapil sab si Maalam sa Asia Para-triatlon Championship sa Subic alang sa relay demo.
Gisalmutan ang maong lumba sa para-athletes gikan sa mga nasod sa Korea, Japan, Malaysia, Hong Kong ug Thailand diin 50 ngadto sa 60 ka para-athletes ang nangapil.
Tumong karon ni Garcia nga himuong tri para-athlete si Maalam aron mamahimo niini nga molangoy, mobisikleta ug modagan.
Apan gikinahanglan ang special bike ug special legs aron mahimo kini sa maong atleta.