GIDUNGGAB sa makadaghang higayon ang duha ka mga piniriso sa ilang ‘mayor de mayores’ sa New Cebu City Jail (NCCJ) sa Barangay Kalunasan ning dakbayan, alas 12:30 sa udto kagahapon.
Si Jail Supt. Johnson Calub niila sa mga biktima nga sila si Alinor Andingan ug Michael Sansan samtang, ang suspek giila nga si Ariel Degamo.
Si Andingan, nag-atubang og kaso batok sa illegal nga druga sukad pa niadtong tuig 2009, gidunggab og 10 ka higayon sa nagkadaiyang parte sa iyang lawas ug si Sansan, nag-atubang og kasong pagpatay, nakaangkon og upat ka samad dinunggaban.
Matod ni Calub, si Degamo nigamit og improvised sharp object diin hangtod sa pagsuwat ning balita wa pa makit-i sa mga jail officer.
Hinuon, gikataho nga anaa na sa luwas nga kahimtang ang duha nga dali sab nga gidala sa Emergency Rescue Unit Foundation (Eruf) ngadto sa Cebu Doctors Hospital sa siyudad.
Gipadayag sa jail warden nga adunay personal nga kalagot si Degamo ngadto kang Andingan unya nisuway og pagpakalma si Sansan sa duha apan giapil na hinuon siya sa pagdunggab.
Sa pagkakaron, temporaryo usab nga gisuspenso sa City Jail ang “dalaw” sa mga tangtungod sukad karong adlawa hangtod maresolbar ang maong problema.
Gialerto usab ni Calub ang tibuok pwersa sa City Jail gumikan sa giingong adunay mass jail break nga himuon ang mga piniriso.
Niadtong Oktubre sa niaging tuig, aduna say kaguliyang nga nahitabo gumikan kay adunay mga inmate nga nisupak sa pagkatudlo ni Degamo isip lider sa tanang piniriso sanglit di siya taga Sugbo. Siya gikan sa Misamis Occidental.
Samtang, si Mayor Michael Rama wa makauyon sa hitabo og nimando kang Calub sa pag-imbestigar.
Gitahasan usab niya si Engr. Eugene Elizalde, presiding officer sa Police Coordinating and Advisory Council (Pcac) sa pagsusi sa maong hitabo.
Ang City Jail dugay nang nagtinguha nga mabalik ang ilang tag P2,000 nga binuwan nga allowance gikan sa City Hall apan gumikan sa hitabo daw nisamot og kahanap ang kahigayonan nga maaprobahan ni Rama.
Ang mayor niingon nga kon matagbaw na siya sa performance nga ipakita sa City Jail, iyang ibalik ang nahanaw nilang pribilihiyo sa bilanggoan sa siyudad.