MAKASEGURO kaha ta nga kon mapasar na kining mga balaod pagkontrolar sa paggamit sa armas maundang o kaminusan na usab kining insidenti sa pagpamusil?
Nag-ong-ong karon ang balaodnon nga Citizen’s Protection Act, Child Safety Firearms Act ug uban pang balaodnon nga gitumong pagkontrolar, pag-estrikto, ug paghatag og mas luwas nga paagi paggamit sa armas de fuego.
Unsa may rason nganong miungot man sa Kongreso ang maong mga balaodnon? Nganong dili man dayon kahimoan og aksiyon sa atong mga magbabalaod? Dili kaha sila konbensido nga bisan pa mopasar ang balaod naa gihapon kining pagpasagad paggamit og armas.
Mibalik kining isyu sa total gun ban tungod niadtong kamatayon sa siete anyos nga si Stephanie Nicole Ella nga naigo sa saag nga bala pagsugat sa Bag-ong Tuig, ug kadtong pagpamusil sa Kawit, Cavite nga nikalas og walo ka mga kinabuhi, lakip ang duha ka mga bata.
Ingon ani ka lanog ang reaksiyon sa mga tawo labi na gyud sa mga prolife organization ug sa simbahan. Kon dunay mahitabo, ayha pa mangusog pag-ayo sa ilang kampaniya. Unya ang gobiyerno sab, murag mapukaw dayon og hinuktok kon unsay angay buhaton.
Kon concern gyud ta sa kinabuhi sa tawo, dili lang nato itotok diha sa paggamit sa armas de fuego. Tingali kon atong kuhaon ang statistic gamay ra gyud ang gidaghanon sa mga tawo nga namatay tungod sa bala. Basin baya mas daghan pa ang namatay gumikan sa aksidenti sa dalan, gumikan sa paggamit og drugas ug pag-inom. Unya unsa may kampaniya sa gobiyerno aron kaminusan kining kamatayon gumikan sa laing hinungdan gawas sa armas?
Hinuon, makapalimbawot sa balhibo kon dunay insidenti sa pagmasaker, pagpamusil og mga inosenti gamit ang armas. Dili ba? Labi na niadtong nahitabo sa Estados Unidos, ning bag-o, diin mokapin sa 20 ka mga gagmayng tinun-an ug ilang mga magtutudlo ang girapido sulod sa tunghaan.
Apan, klarohon nato dili gyud garantiya nga mohumong na kining pagpamusil o pagpasagad og pabuto sa mga armas kon ipasar man ugaling kining mga balaod pagkontrolar sa armas. Labaw nang dili garantiya nga luwas gikan sa pagpamusil ang mga dili armado o sibilyan nga mga tawo.
Ang mas maayong buhaton tingali sa gobiyerno mao kining pagsubay sa ugat sa problema. Adunay mga pangutana nga angay hatagan og pagtagad sa gobiyerno. Nganong dili man nila mapahunong kining tiggama og paltik nga armas? Nganong naa man gihapon kining pagpayuhot og armas? Nganong dunay military o polis nga naghinobra ang armas diin ang uban way lisensiya?
Asa man gikan kining armas sa mga rebeldi, sa mga tulisan ug sa mga badlongon sa katilingban? Kinsa may tig-supply aning armas sa mga private army ug mga goons sa mga politico ug dagkong mga negusyanti? Mapuno nalang ning newspaper dili pa mahuman atong pangutana bahin aning kaluag sa kampaniya sa gobiyerno batok sa mga kwestiyonabli nga magbaton og armas.
Hinuon, dili pa ulahi, karon pa lang kinahanglan seryosohon na gyud unta sa gobiyerno ilang kampaniya batok aning mga saag nga armas, mga way lisensiya. Unahon nato og kampaniya diha mismo sa mga buhatan ug ahensiya sa gobiyerno.