PARA nako, haom ang giluwatang pamahayag ni Talisay City Mayor Johnny delos Reyes (JVR) nga nalipay sila ni Mar Roxas masuportaan sa daghan apan, sila naglaom nga si Roxas mohatag og prayoridad niadtong loyal kaniya.
Matod ni JVR, mura ra gud na og magbuhi ka og anak. Lahi ra kung gikan gyud sa imong tago-angkan kaysa anang gi adopt ra nimo dayun motagad ra nimo kun dunay pangayuon.
Atong masabot nga klaro nga ang buot ipasabot ni JVR si kanhi Kongresista Eduardo Gullas, lider sa Alayon, nga maoy modagan sa pagka mayor sa Talisay. Samtang, ang apo nga si Kongresista Samsam Gullas sa unang distrito maoy giindorso sa pagbisita ni Roxas dinhi sa Sugbo.
Inay si San Fernando Mayor Abe Canoy maoy orihinal nga LP ug una nang gitudlo ni Gob. Hilario Davide III, chairman sa LP sa Sugbo, nga maoy mokontra ni Samsam. Matod pa mat-an pa sa moskitero si Gullas mao nga nasud sa iyang bulsa si Roxas?
PB Sanchez malipayon
Si Provincial Board Member Gigi Sanchez malipayon human sa pagpabot sa korte sa pagpagawas og temporary restraining order (TRO) sa pag-operate sa Bantay Radyo ubos sa Lacto Pafi nga siya ang Presidente.
Nagdoble ang kalipay ni Sanchez, dihang nagpabor na usab ang korte ngadto kaniya ug nagmando sa abogado sa Siam sa pag-uli sa gikuha nga exciter aron makatingog pagbalik ang maong sibyaan.
Samtang atong paabuton ang resulta sa dugang hearing kon magpabilin ba ang Lacto Pafi o mapunta sa usa ka kooperatiba ang pag abang alang sa pagpadagan niini.
Nagbunga ang kaisog
Sa katapusan, nagkatagbo sila si Ernie Delco, acting general manager sa Metropolitan Cebu Water District (MCWD) ug Antonio Canoy, presidente sa Langub Kalunasan Multi-Purpose Cooperative (LKMPC).
Isip usa sa mga nagsunod sa adbokasiya ni Canoy, dako natong kalipay ang panagtagbo sa duha atol sa gipahigayong konsultasyon tali sa mga opisyal sa duha ka habig apil na sa Kalunasan ug siyudad sa Sugbo.
Dungan sa panghinaot nga makab-ot ang kasabotan human nihangyo si Canoy sa MCWD nga adto kanila ibaligya ang bulto sa tubig ug sila na ang moapud-apod ngadto sa kabalayan.
Samtang gipadayag ni Delco nga iyang ipaabot sa board sa MCWD ang hangyo ni Engr. Canoy. Mao ni ang nakanindot sa panagsabot.
(efren_lonzon@yahoo.com ug text sa 09438741888)