DUMAGUETE CITY - Isumiter na unya ni Mayor Manuel Sagarbarria ang annual budget sa konseho alang sa sunod tuig.
Di muminos P640 milyones ang iyang gi-proposed nga budget nga dako kini kumpara sa miaging proposal alang karong tuiga.
Sa miagi, nauyonan nga anaa lang sa P529 milyones diin nadungagan kinig P111 milyones alang sa sunod tuig nga budget.
Apan, kinahanglan pa kining isumite ngadto sa konseho alang sa budget hearing ug paghisgot.
Ang P350 milyones naggikan sa Internal Revenue Allotment (IRA) samtang ang P215 milyones gikan sa income sa dakbayan ug aduna kini beginning balance nga P75 milyones.
Sumala ni Sagarbarria nga ang 22 ka barangay sa dakbayan iya kining gahinan og P2 milyon matag usa alang sa road concreting.
Samtang, laing P10 milyones nga pundo ang iya ibahinbahin sa tanang barangay.
Ang dakong pahat sa budget mapunta kini sa mga sweldo sa mga empleyado diin moabot sa P221 milyones.
Ang mahabilin maoy gamiton alang sa mga programa ug proyekto lakip sa mga maintenance.
Ang mayor mipasigarbo nga ilang nagamit ang saktong desisyon sa niaging budgeting diin iyang gitahasan ang buhatan sa Finance nga kinahanglan nga dunay mahabilin nga pundo aron magamit.
Bag-ohay lang mipagawas ang Department of Budget and Finance og memorandum circular nga nagdili sa paggamit sa mga surplus funds sugod karong tuiga.
Ang dakabayan sa Dumaguete aduna kini gibana-banang P75 milyonones surplus funds.