Vice Mayor Duterte naitok nga gipamugos nga buffer zone

NAITOK ug nagyawyaw og maayo si Bise Mayor Rody Duterte sa mga indibiwal nga nagpugos nga kinatibuk-ang ipatuman ang buffer zone sa dakbayan sa Davao.

Kung ipatuman ang buffer zone, mga nanimuyo kilid sa kasapaan, did-an an nga mopatindog sa ilang panimalay 10 metros gikan sa kilid nga bahin sa sapa.

Alang ni Duterte, sayud siya sa kaayuhan nga dala niini, apan angay sab nga huna-hunaon ang kahimtang sa mga pobreng nanimuyo sa lugar.

"Most of the Filipinos are poor. Mao bitaw nga anaa sila diha. Wa man ko kadungog og datu nga namatay tungod sa baha," ni Duterte sa “Gikan sa Masa, Para sa Masa” program.

Dugang sa opisyal nga sayon kaayo nga ilitok ngadto sa mga indibidwal ang pagpahawa sa mga tawong nanimuyo kilid sa sapa, apan lisud kini buhaton, tungod sa kakuwang sa pundo.

"Sige sugod kita og buldos ugma, unya asa man nato ilabay ang atong kababayan? Dali istoryahon. Kanang utok ninyo nga napuno og logic, you have to understand sab sa imong isig katawo. Eventually, pugson sa pagpatuman ang buffer zone, what do you think will happen? Do you have the money?" isplikar sa edarang Duterte.

Pahayag sa opisyal nga kung duna lamang siyay kwarta, dali lamang ang himuong pagpabalhin sa mga eskwater, namalit na siyag yuta nga kabalhinan.

Nauna nang gipamahayag sa lokal nga gobyerno nga i-relocate ang mga informal settlers nga anaa nanimuyo sa disaster-prone areas dinhi.

Gibutyag ni Robert Alabado III, hepe sa City Planning and Development Office, sa usa ka presscon sa nakalabay nga semana nga way tinong deadline ang relokasyon tungod mag-agad sab kini sa pundo.

Ang pagbaha sa siyudad sa nakalabay nga semana, giyagyag ni Duterte nga equivalent kini sa usa ka tuig nga produksiyon sa Davao City Water District alang sa usa ka tuig nga tubig ilimon sa mga Dabawenyo.

"Ingon ana kadaghan ang tubig nga mibuhos nga gikausa lang, mao nga mibaha gyud," pung sa bise mayor. (Rhona O. Goc-ong)