NAGPABILIN ang kahapdos sa mga ginikanan nga wala pa makab-ot ang hustisya sa kamatayon sa 6 anyos nga si Ellah Joy Pique. Walay hunad nga makatang-on sa masakit nga gidangatan. Karong Peb. 8 maoy ikaduha ka tuig sa pagdagit ug pagpatay sa bata nga nagtungha sa Calajoan Elem. School sa Minglanilla. Gitambog sa bung-aw sa Barili. Nasaypan ang unang gipasanginlan nga manag-uyab nga Norwegian nga si Sven Eric Berger ug Karen Castro Esdrellon nga taga-Tuburan. Mao nay gitumbok sa linuog nga krimen ang magtiayong British nga si Ian Charles Griffts ug Bella Ruby Santos nga taga-Naga. Nakasibat si Griffits sa ilang nasod sa Britanya samtang si Santos nasikop sa NBI sa SM Mega Mall sa Ortegas sa Okt. 07, 2011. Hinay nga mituyok ang galingan sa hustisya. Langay ang tuyok sa ligid sa katarungan apan dili maayo nga bikwangon ang hustisya pinaagi sa pagkomkom sa balaod sa kaugalingong mga kamot. Sama sa naghuramentado nga Canadian journalist nga si John Holdridge Pope sulod sa Palasyo sa Hustisya.
* * *
Ubay-ubay na ang mga presidente sa kanasoran nga gihinginlan sa ilang katungdanan. Mantaga nga mipilit sa ilang trono nga giibot sa dihang mialsa ang katawhan batok sa bangis ug diktadoriyang pamunuan. Produkto sa kadawo sa gahom ug habog nga tinguha pagbutirik sa personal nilang mga intereses. Sama nila ni kanhi Pres. Ferdinand Marcos sa Pilipinas, Hosni Mubarak sa Egypt, Saddam Hussein sa Iraq, Muammar Ghadafi sa Libya, Ali Abdullah Sali sa Yemen, King Shaikh Hamad bin Isa Al Khalifa sa Bahrain ug sila si Habib Bourquiba ug Zine El Abidine Ben Ali sa Tunisia. Hapit na sab mapukan ang malupigong liderato ni Pres. Basher Al-assad sa Syria.
Lahi ang kahimtang ni Gov. Gwen Garcia kay ang gustong mohingilin kaniya mao ang iyang mga kaatbang sa politika apan gihigugma siya sa mga Sugbuanon. Ang iyang panggobyerno maalagaron ug dili gobyerno nga mugna sa pamolitika.
PULOS BIKTIMA
Palisiya nga dili patas, inilogay sa teritoryo ug pagpalapad sa gahom makamugna og kagubot. Ang kagubot moresulta sa gubat. Sa gubat ang tanan polos biktima. Sama sa World War I midaog ang Alies (UK, France, Russia) batok sa Central Powers (Germany, Austria-Hungary, Italy) sa 1914-1918. World War II midaog ang Pilipinas nga gilabanan sa mga Amerikano batok sa Japan sa 1942-1945.
Indochina War midaog ang mga rebeldeng komunista sa Vietnam nga gilabanan sa Soviet Union ug China batok sa France ug gilabanan sa US ug Britain sa 1946-1954. Vietnam War midaog ang North Vietnam nga gilabanan sa Vietcong, National Liberation Front ug mga komunistang nasod batok sa South Vietnam nga gilabanan sa US sa 1955-1975 diin nailog sa North Vietnam ang Saigon nga maoy kapital sa French Colony. Iran-Iraq war midaog ang Iraq sa dihang si Pres. Saddam Hussein misulong sa teritoryo ni Pres. Ayatola Khomeini sa Islamic Republic of Iran ug giangkon ang tinubdan sa lana sa Iran nga mao ang Khouzestan sa 1980-1988. Persian Gulf War diin giilog ni Iraque Pres. Saddam Hussein ang Kuwait sa gulfo nga nadato sa lana sa 1990-1991. Naminti sa kasuko ang UN pinangulohan ni US Pres. George Bush hinungdan sa pagkapukan ni Hussein. Samtang nagpadayon karon ang Iran-Israel war. Ang Iran miputol sa diplomatikanhong relasyon ug mibugto sa bugkos sa patigayon tali sa Israel ug giangkon nga sakop sa ilang hurisdiksyon ang maong nasod. Tensyon miulbo kay buot hakpon sa hardline sa Iran nga si Mahmoud Ahmadinejad ang pundo pagpalambo sa armas nukleyar. Kuyaw ang Israel nga mahiagom sa pangatake sa Iran.
(csa-1156@yahoo.com/0905-250-4643)