MAGBANGI karon ang Southern de Oro Philippines College ug ang Lourdes College sa number one slot sa bracket B sa Hoop-it-Up Cagayan de Oro Basketball Federation-Philippine Collegiate Champions League City Elimination.
Ang event ipahigayon didto sa ACSAT GYM, Barangay Carmen.
Krusyal kini alang sa SPC Sharks ug sa Lourdes, nga parehas adunay 2-0 win-loss record matag usa, kay kung kinsay modaog nila makalikay pag-atbang sa Xavier University sa crossover round.
“Krusyal ni alang kanamo kay hard labor kung mapilde mi kay bugat kaayo kung maatbang namo ang XU sa crossover,” ingon ni Marcelo Reambonanza, sports coordinator sa SPC.
Dili sab magkumpyansa ang Sharks kay nakatilaw kini og sakit nga kapildehan batok sa Lourdes College sa away sa ikatulo nga pwesto sa Loyola Cup ning tuiga. Apan, gikalipay ni Sharks coach Rey Dangcal ang timing nga pag-abot nila LJ Aquino ug kanhi STI Olympians nga si Emmanuel Akut IV sa linya sa Sharks kay nakadugang kini og kusog sa opensiba nila.
Hayag na daan ang XU Crusaders ni coach Rocky Calingin nga maghari sa bracket A bisan pa man nga mapilde sila sa Pilgrim Christian College sa ilang kataposan nga dula sa elimination round karon.
Sa crossover round, ang numero uno sa bracket A moatbang sa ikaduha sa bracket B samtang ang una sa bracket B mokontra sa ikaduha sa bracket A.