NIHANGYO ang usa ka opisyal sa pundok sa mga layko dinhi sa Sugbo sa ubang mga artsidyosesis nga motabang sa kampanya sa simbahang Katoliko sa pakigbatok sa same-sex marriage dinhi sa nasod.
Si Dr. Rene Josef Bullecer, bise presidente sa Sangguniang Laiko ng Pilipinas-Visayas, nasagmuyo tungod kay ang Artsidyosesis sa Sugbo lang ang aktibo nga nibarog batok sa pagpalabang sa House Bill 110 nga nagtugot sa pagminyo sa managsama nga mga babaye o lalake.
“Nanawagan ta sa ubang archdioceses barog sad mo oi! Kami ra man ang nagsaba-saba,” padayag sa kasagmuyo ni Bullecer.
Siya niawhag sa katawhan sa Sugbo nga moapil sa ipahigayon nga inter-faith prayer rally batok sa same-sex marriage karong adlawa sa Archbishop’s Palace Compound sa dakbayan sa Sugbo.
Ang kalihokan tambungan sa mga opisyal ug representante sa nagkadaiyang pundok sa tinuohan, sama sa simbahang Romano Katoliko ug Muslim nga sugdan alas 3:00 sa hapon sa SPFY Covered Court sulod sa compound.
Si Cebu Archbishop Jose Palma niluwat og circular nga nag-awhag sa nagkadaiyang kura paroko, kadagkuan sa relihiyusong pundok ug ubang kapunungan nga mosalmot sa inter-faith prayer rally.
Ang mga magbabalaod sa Sugbo ang kompirmado motambong niini.
Si Bullecer nikompirmar sa pagtambong nila ni Representatives Gwen Garcia sa ikatulong distrito, Raul Del Mar sa amihanang distrito sa siyudad sa Sugbo, Samsam Gullas sa unang distrito, Benhur Salimbangon sa ikaupat nga distrito, Gabriel Luis Quisumbing sa ikaunom nga distrito, Ace Durano sa ikalimang distrito ug Aileen Radaza sa lone district sa siyudad sa Lapu-Lapu.
Si Bullecer namahayag nga dili angay motugot ang Pilipinas nga mahimo nga ika-27 nga nasod sa kalibotan ang naghimo nga legal sa same-sex marriage, ang labing uwahi ang Puerto Rico.