Sa miaging semana nag-iyahay lag labyog sa kusog ang Liberal Party (LP) ug United Nationalists Alliance (UNA) sa ilang Proclamation Rallies nga gihimo.
Ang UNA diri sa Sugbo sa Plaza Independencia samtang ang LP didto sa Plaza Miranda sa Manila. Libuan ka mga tawo ang nanambong sa duha ka mga rally.
Nasagmuyo kining maglilindog sa mga senatorial candidates nga gipangproklamar sa duha ka mga partido. Gawas sa mga reelectionist nga may kasinatian na sa senado ang uban klarong accommodation lamang.
Wa maayong pagkahimbis. Nakandidato lang tungod kay anak og bise presidente. Asawa ug mga anak og senador. Diha pay kanhi socialite nga kapikas sa uyoan ni PNoy.
Makaingon ta nga giduhal-duhalan lang ang kaligdong sa Senado sa maong mga kandidato.
Ang Senado baya maoy pultahan ngadto sa pagka Presidente.
Busa gikinahanglan nga ang buot magsenador kompleto sa balhibo ug taas ang lupad sa pangutok. Dinhi makaingon ta nga kining mga tawhana nagsalig sa pangalan lamang.
Ang uban nagsalig sa popularidad bisag way hanaw. Sa pagduhal-duhal sa Senado kauban baya ang mga elector kon wa mailad nadala lamang. Ang unang nakasakay sa iyang kabantog mao ang actor nga si Rogelio de la Rosa nga napiling senador sa dekada ’60.
Gisundan ni Joseph Estrada sa dekada ’80 ug ni Lito Lapid sa 2000. Naay mga aktor nga napiling senador apan mga anak og mga inilang actor sad sama nila ni Jinggoy Estrada ug Bong Revilla.
Asa na man ang kalibre sa kanhing mga senador nga sila si Claro M. Recto, Lorenzo Tanada, Juan Sumulong, Arturo Tolentino, Ambrosio Padilla, Jose Diokno, Jose P. Laurel, Cipriano Primicias, Decoroso Rosales ug Benigno Aquino Jr.
Igo na lang kining lindog sa paghandom sa ilang kaligdong, kahait ug panlantaw. Makita nato ni panagsa karon nila ni Juan Ponce Enrile, Joker Arroyo, Miriam Santiago ug mahimong iapil sila si Chiz Escudero, Koko Pimentel, Peter Cayetano ug Panfilo Lacson.
Ang uban diha sa Senado mga pakapin lamang, buwak-buwak ug tawo-tawo nga naninguha nga mailhan aron ingnon nga abtik, makamao ug utokan. Pastilan baya.
Sayod ako nga ang intelihente nga mga botante kamaong mopili, apan ang masa daling mapalit, malingla, mailad ug kuwang sa panimpla mao nang mapili ang di angayng pillion.