SAMTANG nagkaduol na ang bugnong lugaynon ug nag-iyahay na'g diskarte ang mga kandidato, nagkadaghan sab ang kalihukan sa mga civil society groups ug ahensiya sa gobyerno sa pagseguro sa luwas, limpyo ug hapsay nga piniliay.
Niadtong niaging duha ka semana, ang Comelec ug kapulisan nagpahigayon og Peace Covenant.
Gisundan kini sa candidates forum didto sa Ateneo de Davao University nga gipasiugdahan sa Ateneo Public Interest and Legal Advocacy (APILA) ug radio forums. Ang election watch dog sa simbahan nga Pastoral Parish Council for Responsible Voting (PPCRV) sa nagkadaiyang parte sa nasud nagpahigayon sab og programa nga "Don't Buy Me" diin naghural ang mga kandidato nga dili mogamit og kuwarta aron makakuha'g boto gikan sa mga kandidato karong Mayo.
Ang mga child-rights advocates naglusad usab niadtong Marso 7 didto sa kaulohan sa BATA MUNA CAMPAIGN. Buot sa mga organizers niini nga ibutang sa plataporma sa mga kandidato ang isyu ug hisgutanan sa mga bata.
Naghimo og kalihukan ang mga bata nga sakop sa Children 2 Children (C2C) program sa Save the Children International ug uban pang international NGOs ug niadto sila sa buhatan sa Comelec sa kaulohan aron dal-on ang ilang hiniusang tingog ug madunggan sa mga kandidato nga maoy modumala sa atong nasud sa sunod tulo ka tuig.
Si Comelec Chairperson Sixto Brilliantes mismo ang niatubang ug niadawat sa mga bata kauban ang iyang mga commissioners ug ubang ahensiya sa gobyerno.
Dinhi sa Davao ug sa upat ka siyudad sa Mindanao, giplano nga mopahigayon og susamang kalihukan pagkahuman sa Semana Santa pinaagi sa mga media forums diin ang mga bata mismo ang tigpamaba ug mo-agni sa mga kandidato nga ilang lantawon ang kahimtang sa mga kabataan sa Mindanao sa ilang paglingkod unya sa puwesto.
Ang kabataan sa Mindanao naghangyo nga tubagon ang problema sa kakulang sa oportunidad sa edukasyon ug batakang serbisyo sa panglawas ilabi na sa mga batang lumad ug Moro; pagduso og balaod o programa aron mawala na ang pagpatrabaho sa mga bata sa minahan, plantasyon ug logging; ug ang paghingusog nga dugang maprotektahan ang mga kabataan ug kabatan-onan sa padayong pagpang-abuso ug pagpahimulos sama sa prostitusyon, trafficking ug corporal punishment.
Kalabot niini nga unta mahimo nang balaod ang Positive Discipline Bill ug ang tukmang pag-implementar sa Republic Act 9344 o Juvenile Justice and Welfare Act inay nga punayan kining debatihan ug usbon.
Duna may mga grupong nagplano nga usbon ang age of criminal responsibility (ACR) sa bata gikan sa 15 anyos nga nalatid sa balaod pabalik sa 9 anyos.
Gawas sa Save International, gipasiugdahan ug gisuportahan ang kampanya sa World Vision, Plan International, Children’s Funds, JIB Foundation, Mindanao Action Group for Children's Rights (MAGCRP), Caraga Emergency Response Group (CERG), Mindanao Emergency Response Network (MERN), Luna Legal Resource Center ug uban pa.
Dako kining kampanya sa pribadong grupo nga unta atong suportahan ug tagdon sa kandidato ang tingog sa mga bata ug magiyahan ang botante sa pagpili sa mga angayang ibutang sa puwesto karong Mayo 2013.
Ang interesadong moapil mo-email sa luna_wcrights@yahoo.com o sa tambayan2009@gmail.com o https://www.facebook.com/BATA.MUNA.