CARMEN, North Cotabato -- Lain na sab nga transmission tower sa National Grid Corporation of the Philippines (NGCP) ang gibombahan, alas 4:30 sa hapon niadtong Sabado, Setyembre 3.
Matud ni Superintendent Bernard Tayong, tigpamaba sa North Cotabato Provincial Police Office, nga mibusikad ang Improvised Explosive Device (IED) sa Tower #103 didto sa Barangay Kitulaan, Carmen.
Wala matumba ang tore, hinuon midahilig kini apan wala kaayo makaapekto sa suplay sa kuryente.
Ang 138 KV line sa Tower #103 maoy nagkonektar sa Kibawe, Bukidnon ug Tacurong City Line sa NGCP.
Ang duha ka IED nga gama sa bala sa 60 mm mortar gibutang sa tiilan sa steel tower nga dunay sagol nga 9 volts battery, wirings, ug cellphone isip triggering mechanism.
Sa pagkakaron, nagpatuman og rotational brownout ang Cotabato Electric Cooperative (Cotelco) samtang padayon nga giayo ang tore.
Kahinumdoman nga sunud-sunod nga gibombahan ang mga tore sa NGCP sa North Cotabato ug Maguindanao nga maoy hinungdan sa hataas nga brownout.
Grupo sa Alkhobar Terror Group ang gitudlo sa mga otoridad nga maoy sagad mamomba sa mga transmission line sa NGCP sa nagkadaiyang dapit sa Mindanao.
Gawas niini, dunay problema sab sa bayad sa mga yuta nga gitarukan sa mga tore sa NGCP nga hangtud karon wala pa maresulba.