GIBUTYAG ni Engr. Armen Cuenca kinsa assistant chief sa City Disaster Risk Reduction Management Council (CDRRMC) ning siyudad sa Cagayan de Oro nga sukad nga ilang gilusad ang emergency hotline number nga 888 pulos lamang prank calls ang ilang nadawat.
Butyag ni Cuenca nga niaging semana kini nila pormal nga gilusad apan halos mag-usa na ka semana walay insakto nga emerhensya ang ilang nadawat gawas lamang sa pulos pagbinuang.
Moabot sa 100 ka mga prank caller ang ilang nadawat nga human nila ug tubag kalit lang dayon sila buhi-an sa pikas linya.
Matud ni Cuenca nga taliwala niini padayon sila nga nag-aghat sa katawhan sa siyudad nga magtimbayayong kanila pinaagi sa pagpakabana ug pagpaabot kanila panahon sa emerhensya.
Giingong nilang 24 oras ang ilang pagserbisyo ug nga dili sila magduha duha sa pagtubag sa bisan unsa man nga tawag o panginahanglan sa mga Kagay-anon.
Gipasabot ni Cuenca nga bisan unsa nga panginahanglan ilang tubagon apan ila kining irefer sa insakto nga ahensya nga maoy motubag sa panginahanglan niini.
Nanawagan si Cuenca nga kung dili emerhensya ug ang tumong magbinuang lamang sa pagtawag dili nalang kini himoun. (SVB)