DUNAY sugyot nga ipatuman ang usa ka matang sa “no work, no pay policy” alang sa mga magbabalaod isip silot niadtong magsigi og palta sa mga session sa Kongreso – multahan kadtong mga absinero.
Kining mga magbabalaod nga mga absinero maoy hinungdan nga daghang higayon nga way quorum sa Kongreso ug di mapasar ang mga mahinungdanong balaudnon.
Kon ipatuman ni, tingali ang di kamultahan mao ra si kanhi kongresista Raul del Mar sa amihanang distrito sa syudad sa Sugbo kay sigon sa iyang political ad, 100 porsento ang iyang attendance sa House of Representatives sud sa 20 ka tuig.
***
Apan epektibo kaha kining pagpahamtang og multa sa mga magbabalaod, sa mga kongresista ug mga senador, aron makakuha og quorum sa ilang mga session?
Mahadlok kaha ni sila og multa? Motunga na kaha sila sa mga session aron mapasar ang mga mahinungdanong balaudnon nga sagad mangamatay na lang kay gi-adjourn ang ilang session kay way quorum?
Nagduda ko niini kay matod pas taga Cabadiangan, ang mga kongresista ug mga senador wa magsalig sa ilang suweldo.
***
Ang pagtambong sa mga session sa Kongreso mao ang kinamenusang obligasyon sa usa ka magbabalaod. Pananglit motunga siya sa matag session unya magduka-duka lang ug matug pa gani ug di na kaapil sa mga lantugi ug debate sa usa ka balaudnon, di siya multahan?
Sama ra unya ni sa estudyante nga gipapasar sa iyang magtutudlo kay present man pirmi.
Mao nay gitawag og liningkoran.
Ang maayo tingali mao nga ang mga botante mopili sa mga kandidato nga klarong moalagad ug dunay ikaalagad sa katawhan.
***
Nagsugod niadtong Dominggo ang kampanya alang sa mga kandidato sa lokal nga puwesto.
Niadto pa unta kini magsugod sa Marso 29 apan gidili ang pangampanya sa Biyernes Santo ug wa say mangampanya sa Sabado de Gloria kay patay pa lagi ang Ginoo.
Apan dunay mga kandidato kansang binuhatan angay nga daygon - ang pagpanangtang sa ilang mga illegal nga campaign materials.
Lakip niini sila manlalaban Aristotle Batuhan, kandidato sa pagkakongresista sa habagatang distrito sa syudad sa Sugbo nga nangunay sa pagtangtang sa iyang mga oversized posters ug si Mandaue City Mayor Jonas Cortes nga nagulo sa mga opisyales sa Mandaue pagpanangtang sa mga illegal campaign materials, lakip sa pagkiskis sa iya mismong poster.