GIDELAMAS ang duha ka mga tulisan nga nagmotorsiklo kay nadakpan sa kapulisan human nila biktimaha ang usa ka ahente sa sigarilyo kagahapon sa alas 12:30 sa udto sa Barangay Catmondaan, Catmon, amihanang Sugbo.
Ang mga suspek gidudahang maoy mangigoay sa pipila ka mga ahente sa amihanang Sugbo.
Sila si Rey Paradiang,41, minyo, taga Barangay Cabadiangan, Compostela, ug Lorence Mendoza, 35, taga Barangay Jubay, Liloan, wa makaipsot sa blocking force sa kapulisan.
Sila si Paradiang ug Mendoza nakuhaag tagsa ka kalibre .45 nga pistola nga puno sa mga bala ug motorsiklo nga Rusi kolor puwa dihang nadakpan sa Barangay San Jose, Catmon, nga naa na sa utlanan sa lungsod sa Sogod.
Si Leonilo Gaballes, 46, minyo, taga Barangay Tipolo, dakbayan sa Mandaue, ahente sa Mighty Corp., nakuhaan sa halin nga P3,970.
Si Sr. Insp. Roberto Hugo, hepe sa Catmon Police Station nga nahinabi sa Sun.Star Superbalita, nagkanayon nga si Gaballes uban sa iyang driver naniudto sa usa ka karenderya human sa pag-deliver sa mga sigarilyo sa ilang mga suking tindahan.
Ning-abot ang duha ka mga suspek sakay sa motorsiklo nga naka-bonnet.
Nagpakaaron ingnon sila nga mopalit og sud-an, nangabli pa sa mga kaldirin.
“Pag-abli sa kaldirin, miana ang mga suspek nga bugnaw naman ning sud-an, mibunot gilayon sa ilang armas, mideklarar og tulis,” asoy ni Hugo base sa sulti ni Gaballes.
Wa makalihok si Gaballes ug ang iyang driver ingon man ang tindera sa karenderya sa ilang kahadlok.
Nakuha nila ni Paradiang ug Mendoza belt bag ni Gaballes diin didto sa sud ang kuwarta.
Ninsibat ang mga suspek paingon sa lungsod sa Sogod.
Apan ang mga residente nga nakakita sa hitabo daling nakapahibawo sa barangay official nga maoy nitawag sa kapulisan.
Nipahigayon silag roadblock samtang ang iyang ubang mga sakop nga nagsakay sa patrol car ilang gipalahos sa bukid ibabaw sa munisipyo diin ang karsada paingon sa bukid sa Barangay San Jose.
Akto nga nakaposisyon ang iyang mga sakop sa utlanan sa maong dapit, mao say pag-agi sa mga suspek nga wan a makabalik sa agi hinungdan nga nadakpan.
Ilang nabawi ang kwarta ni Gaballes.
Si Mendopza maoy nagmaneho sa motorsiklo samtang dihang gipangrekisa nakuhaag tagsa ka armas.
Sila nagtuo nga ang duha maoy responsabli sa mga pagpanulis sa mga ahente nga mag-van sa norte nga gipangpriso human mabiktima.
Ang duha ila nang giimbestigar samtang gihikay na nila ang tukmang kasong ipasaka batok kanila.